超之選20210110

又返到田草賽事，今期賽事難得地冇任何騎師停賽，亦冇任何騎師坐冷板櫈，係季內少有地所有騎師都會上陣嘅賽日。雖然今日並唔係大賽日，但係相信大家都會特別尾場二班1400米賽事，因為呢場賽事都有唔少四歲馬列陣，「勁搏」、「喜豐寶」同「錶之未來」嘅表現更加備受注目，因為呢三匹馬不單止有意出戰四歲系列，而且佢哋同樣都係喺上仗贏馬而回。當中「勁搏」季內三戰全勝，休戰三個月後復出，並由1800米縮程跑返1400米，用意都明顯部署經典一哩賽；「喜豐寶」上仗出戰同班同程亦一出即勝，表現亦令人深刻；「錶之未來」上仗亦贏出同程賽事，今次初戰二班即面對強手，亦係一個指標睇佢有否能力再上一層樓。當然，今次亦有三匹初出自購馬都係以四歲系列賽為目標，都係時候睇下佢哋進度如何。