又去到週中谷草夜賽場合，今期出賽馬數目總算全數滿額，當然有部分場次水準都係頗低，亦有啲好似尾場咁機會均等而水準唔錯嘅賽事。去到十月中，依家就得返何良一位練馬師仍未開齋，而佢現時養馬量唔多，如果要畢業就真係要加把勁；騎師方面，就仲有四位華將仍為打開季內勝利之門而努力，佢哋今晚又可唔可以一吐烏氣呢？
今期重心馬方面，我就會揀第七場嘅「興惑」。呢場賽事就冇乜邊匹領放馬，相信早段步速亦都未必太快，變相中段形勢如何就會最為關鍵——近季谷草中距離賽事當步速偏慢嘅時候，好多時都總會有一兩匹馬會選擇中段變奏，賽事形勢往往都係咁樣逆轉。睇返今場賽事，如果步速真係偏慢嘅話，有啲馬好似「南莊加寶」、「扎西德勒」或有可能會選擇變奏，畢竟佢哋都係抽到外檔起步而形勢稍為被動，都有一定條件去採取呢種策略。若然真係出現變奏的話，最後亦可能出現入面塞死而出面冚曬嘅情況，因此呢場小弟會揀啲排中外檔而有績嘅馬。
事實上，今次「興惑」抽到7檔，相信都係會守居中二疊位置，而若果真係出現變奏嘅話，都相信佢並唔會係其中一匹喺入面塞死嘅馬。而呢匹日本馬上季贏馬一役正正係谷草1800米，而鞍上人亦正正係何澤堯，今次馬匹去返贏馬路程一用返贏馬騎師，路程根據同騎師配搭方面係無需擔心。操練方面，馬匹之前一直都上從化操練，亦試咗課1200米泥閘，走勢亦都相當唔錯，狀態亦都理想，加上馬匹現時評分已屆新低，比贏馬時嘅評分再少3分，喺評分稍有反彈空間下可搏「興惑」贏出賽事。
留言