開季都差唔多有一個月，各項大賽都即將上演。今季有別於往年，今季慶典盃同國慶盃係會分開兩日上演，而先打頭陣嘅就係慶典盃。講到慶典盃，相信大家都係會著眼於「美麗傳承」同「金鎗六十」嘅對決，因為一匹係一哩馬王，另一匹就係上季四歲系列三冠盟主。誰勝誰負都好，今次對「金鎗六十」而言都會係一次幾好嘅熱身同經驗，皆因佢今次唔止係佢季內初出，亦係首次對住「美麗傳承」呢啲級數嘅馬，因此都期望馬匹可以交出具競爭性嘅表現。
講到賽日重心方面，今次莫雷拉手馬都一如既往地好，亦不乏機會馬，當中有三匹雖然係熱門之一，但考慮到係因莫雷拉策騎，其實都有唔錯嘅分頭：
R3 鑽飾明駝
「鑽飾明駝」呢匹馬上季一直受傷患困擾，轉倉後健康情況則有所改善，走勢、試閘表現亦見慢慢重回正軌。誠然馬匹出賽十七次只得一次亞軍，但係馬匹本身都係跑1200米居多，而呢匹「鑽飾明駝」從落腳到加速力都顯然唔係一匹短途馬，因此表現不佳實屬正常。講返佢在港唯一一次上名，當時「鑽飾明駝」仍然係三班馬，出戰田草1400米僅負「邊個邊個」而贏到「標準猴王」取得亞軍。論賽績水準，呢個績證明「鑽飾明駝」跑1400米其實有一定威力，只係過往一直都冇被好好利用。既然馬匹跑返唯一上名路程，而評分亦見新低，不妨可搏馬匹在港打開勝利之門。
R7 青心星
「青心星」呢匹馬上季季尾初戰泥地1200米，當日莫雷拉跑得比較保守，冇著意俾隻馬放而扣實隻馬，多多少少都影響到馬匹表現，而呢場賽事入面，「青心星」最後都僅負「夢幻人生」頸位，以一匹初戰泥地嘅馬而言，表現已算理想。今次馬匹再戰同程，對於馬匹能否放出，其實有少少保留，因為呢場至少有「醒神」、「八卦」、「平常心」、「高友之星」都有搶放嘅可能，如果「青心星」依然故我唔想放，都仲有可能避免到群駒互燒嘅局面，而且若果前面鬥放嘅話，段加分快下莫雷拉就未必要著意死捉「青心星」，可以俾佢守四、五位之間順走，若然前面燒乾，或有黃雀在後嘅可能。
R9 威威心得
「威威心得」本身傷患紀錄一大蘿，出賽表現比較反覆，但上季轉去蘇保羅馬房後表現漸見穩定，三仗取得亞季殿各一，雖然仍未能贏馬，但總比上兩手時好。再拆解上季三場表現，當中兩場「威威心得」都係輸俾「寶成智勝」，表現絕不失禮。當然，如果要數佢取得季軍嗰場，當日我「威威心得」輸「寶成智勝」半個馬位，但「發財寶」就僅以頸位輸俾「寶成智勝」，因此今次「威威心得」、「發財寶」同場對決，都會有唔少人秤先「發財寶」。不過，再睇返當日負磅，當時「發財寶」負110磅，而「威威心得」負120磅；但係今次「威威心得」同樣負120磅嘅同時，「發財寶」就要負121磅。換句話說，一旦「發財寶」冇咗輕磅威力，而「威威心得」能夠保持水準，論機會都係「威威心得」會比較高。況且「威威心得」中喺七月時已經喺從化開操，賽前亦試過兩課大閘，狀態亦已見水準。鑑於今場賽事水準非高，可以搏「威威心得」成功為蘇保羅取得頭馬。
Comments