超之選20200708

今期係本季倒數第二期嘅谷草賽日，繼續跑九場賽事。隨住莫雷拉因犯規而於煞科日停賽嘅關係，莫雷拉今季喺谷草賽事已經提早煞科，變相今季冠軍騎師嘅得主已經幾近呼之欲出。反而練馬師方面情況就依然競烈，頭三位剛戰一人贏到一場，而大摩就大演帽子戲法，加上退休在即都毫無保留，數字上仍有機會後來居上。計埋今晚，今季賽事就只剩29場（如無意外煞科日都係會跑足9場），變咗每一場都成為冠軍練馬師嘅關鍵。

今次全日重心我就揀咗尾場三班1800米嘅「水箭龜」。「水箭龜」上次增程出戰2200米表現未如理想，原因其實可以歸咎於當日「水箭龜」一改平日居前跑法而採取被動跑法，加上步速極慢，自然就未能交出平日準蠅嘅表現。翻查以往「水箭龜」出賽片段，佢性能比較均速，末段同對手鬥韌力，並非以爆炸力為殺著。今次「水箭龜」換上田泰安抽2檔，相信今次冇藉口去著意留後，加上馬匹狀態去到季尾依然理想，跑返曾經贏過嘅1800米亦更為穩陣。因此上賽表現失準大可以當粉筆字抹走佢，不妨信多次「水箭龜」都冇壞。