六月最後一個賽日，亦係季內最後一次星期六賽事，今期沙田日賽跑返十場賽事，因此頭場開跑時間會係一點鐘。騎練形勢方面，隨著潘頓剛於星期三同呂健威一齊大四喜，現時領先莫雷拉7場，冠軍騎師之爭都開始明朗化；至於冠軍練馬師之爭，呂健威贏夠4場後現時只落後姚本輝2場，而第三名嘅告東尼都只落後姚本輝4場，相信都要去到最後一日先知誰勝誰負。
今次我就揀咗兩匹半冷馬，分別係第五場四班泥地一哩嘅「乘勢歡心」同第十場二班千四米嘅「競駿天驕」。
先講「乘勢歡心」，「乘勢歡心」本身曾跑一次泥地但未能上名，但當時馬匹進度比預期稍慢，而且1200米亦嫌短，此場敗績並唔能夠咬定馬匹唔識跑泥地。事實上，「乘勢歡心」父系為Dubawi，在港同父馬不乏泥地專家，血統上適合泥地賽；而且馬匹跑法主動，而今場只有「威震天」一匹領放馬，只要馬匹能夠克服外檔，搶佔先機，不單止可以賺取步速形勢，更加有權一放到底。
另外，尾場「競駿天驕」初戰二班，面對實力不錯嘅對手，上仗跑三班又未能勝出，票數稍為冷落亦不意外。不過，唔好忘記「競駿天驕」性能並非短途馬，即使係大前次能勝出谷草1200米，某程度上係因為久休復出同有新鮮感。再睇返上季部署，練馬師都已經安排過佢增程1400米而一再交出表現，都反映到「競駿天驕」升班增程並非冇原因。
再睇返「競駿天驕」最近一課大閘，馬匹走勢相當洶湧，頗具作戰水準，縱使現階段能力未必係呢組數一數二，但可憑狀態同體力補數，畢竟馬匹今季用得唔算太多。形勢方面，今場相信都有唔少馬會快放，步速分分鐘會偏快，所幸「競駿天驕」抽到1檔起步，頭段唔洗勉強搶前都能守到好位，而且若果到時幾匹領放馬互燒的話，預期守5、6位嘅「競駿天驕」或可因步速之利交出表現。
Comments