因為上週本地賽事輪空關係，谷草夜賽亦都有兩個星期冇上演。數下數下，今期已經係今季倒數第三次谷草賽事，因此出賽馬都係滿額，但因為有分組嘅關係，參賽馬水準就唔算太高，刨馬時都要留意下。
今次我嘅全日重心係尾場二班1200米嘅「禾道駒」。「禾道駒」上次轉場沙田挑戰分級賽失敗，今次回師首本路程谷草1200米，面對冇咁勁嘅對手，自然跑起上嚟會更得心應手。事實上，「禾道駒」歷來出戰過18次谷草1200米共取得5冠4亞3季成績，上名率超過六成，可以話係此程路程專家，不得不防。
步速形勢方面，尾場步速或唔會太慢，皆因「實力飛駒」、「團結精神」都會搶放，而排11檔之「美麗友盈」或會被逼搶前，變相步速未必因為冇馬走而偏慢。「禾道駒」好多時都採取後發先至之策略，若果臨場步速夠快的話，有權後上殺曬所有對手。
Kommentare