今期谷草賽日又又又係跑九場，頭場開跑時間六點九，但賽事水準一如早前地不甚吸引，辛苦要做live的手足喇。騎師榜方面，莫雷拉喺剛剛嘅星期六連中三元，頭馬數字總算追返近潘頓。今次莫雷拉騎足九場，又能唔能夠藉坐騎較多反先潘頓呢？
今期有好幾場可以揀嘅馬並唔多，就好似第七場三班1200米賽事，雖然係三班，但水準就弱得可憐，皆因呢組馬充斥住啲進度不足或實力見盡嘅馬。相對而言，呢場唯一一匹初出馬「加州凱歌」就頗為值搏。
首先，呢組識贏嘅馬今季大多都拼搏不少，去到季尾階段體力已有回落跡象，表現亦會打咗啲折扣；相反「加州凱歌」落地大半季一直只操不賽，體力上相對充沛；其次，「加州凱歌」在港試閘都展現一定前速，而呢組馬具備前速嘅馬唔多，跑法主動嘅「電訊驫馬」近仗表現又唔夠銳利，可相信抽到10檔嘅「加州凱歌」立心搶放，憑藉其前速佔據有利位置，再因應步速未必太慢嘅情況下，即使「加州凱歌」未足十成狀態，仍有可能因形勢及體力一出即勝。
Comments