「四歲功名，一生一次」，今期沙田賽事，有四歲系列尾關香港打吡大賽。「金鎗六十」先後輕取頭兩關，今次擺下擂台陣，力爭繼「佳龍駒」之後另一匹四歲三冠王；同場對手方面，「勝得精彩」上次用上莫雅交出超水準表現，今次用返莫雷拉。血統上，「勝得精彩」性能偏向短途，跑2000米似乎對佢係一個幾大嘅考驗；「幸福笑容」上賽表現稍為失望，不過睇佢落腳，2000米其實都幾啱佢跑，不過抽到1檔就要考考潘頓功夫，皆因自香港打吡大賽轉跑2000米後，就未有1檔馬可以勝出賽事。
其他邊線馬方面，「孖寶兄弟」係名氣馬，但四歲系列頭兩關都好似名大於實，要贏就要大幅進步；「勇猛神駒」本身算係巴西馬王級份子，難得南美馬嚟到香港都好快交出表現，相信都係一匹好馬，而佢立心儲儲埋埋嚟跑呢場，用意都明顯地司馬昭之心，只係今次抽到12檔，希望可以守到好位；「必妙星」叫做唯一曾於同場同程贏馬，不過佢贏到嘅「時時有餘」、「超級綠洲」都係屢拚不果，三匹馬叫做此程有根據但都似是而非。至於其餘六匹，相信都係至在參與。
如果你問我今年打吡點排，我會排「金鎗六十」為首選，「幸福笑容」為次選，「勇猛神駒」為三選。
Comments