今屆經典一哩賽參賽馬整體評分雖然係近季最低，但睇賽績而言平均水準反而係近季最高，各匹參賽馬可謂平分秋色，唔跑過都唔知龍與鳳。往年呢項賽事都係自購馬（PP）嘅天下，自2008年開始PP連續10年贏出呢項賽事，直至2018年先由自購新馬（PPG）「當家精選」打破呢個壟斷。
呢幾季嘅經典一哩賽，PPG同PP嘅比例都爭非常遠，不過今季嘅情況就截然不同（見下表），PPG同拍賣馬（ISG）紛紛異軍突起，情況為近年少有。
近五季經典一哩賽參賽馬比例
馬季 | 參賽馬數目 | 自購馬 | 自購新馬 | 拍賣馬 |
21/22 | 14 | 7 | 6 | 1 |
20/21 | 14 | 13 | 1 | 0 |
19/20 | 9 | 6 | 3 | 0 |
18/19 | 14 | 13 | 1 | 0 |
17/18 | 11 | 10 | 1 | 0 |
16/17 | 14 | 11 | 2 | 1 |
往時PP可以壟斷四歲賽，其中一個原因係PPG同ISG水準同PP始終有段距離。PP就算嚟到唔夠狀態仍憑質素取勝，但係當PPG同ISG水準愈嚟愈好嘅時候，情況就有所改變。呢樣嘢除咗歸功於馬販外，近年練馬師、馬主嘅眼光都越嚟越闊，因而更能夠揀選適合香港及具質素嘅新馬。「當家精選」、「達心星」等都係由馬主或家族成員親自挑選，「金鎗六十」則係由練馬師呂健威親自為馬主引入。
除咗PPG及ISG質素提升外，呢啲PPG來港前亦準備充足。佢地大多喺外地做好基礎訓練及早喺兩、三歲時已經抵港甚至在港出賽。呢啲馬本身已具有一定質素，再加上有較多時間適應香港競賽環境，面對一堆較遲抵港而未適應好嘅名氣PP，進度自然能夠喺四歲系列佔優。以今屆經典一哩賽為例，七匹PPG或者ISG全數都至少贏過三場頭馬，外地莊家Bet365更視二班winner「包裝長勝」同「加州星球」為經典一哩賽兩大熱門。反觀PP「喜譽寶」來港後即使贏過一哩賽事，但賽績證明唔多，升到二班兩場都贏唔到，即使有晒路程根據下都只被列為第三熱門。
除左因為PPG同ISG因素外，近年評分員對PP初次評分變得手緊。除咗因為唔少高分PP來港後表現不似預期之外，另外一個問題就係在於近年外地限齡賽水平下降。往年經典一哩賽名額都會俾啲高分PP壟斷，但喺新制下，所有未出賽PP都會被調低5分，當中有啲PP初次評分亦由8字頭調低至7字頭。PPG或ISG如79分嘅「醉眼光」就係呢個制度受益者，成功獲得經典一哩賽入場券。
講到近年，唔少贏過海外一級賽嘅名氣PP馬都係雷聲大雨點小。馬報錦標盟主「喜裝寶」在港18戰只得2亞，蘭域堅尼錦標頭馬「包裝永勝」跑五場就匆匆退役；「佳騰駒」同「達龍駒」挾昆士蘭打吡冠軍之名來港，雖然佢哋來港後都能夠贏馬，但最終都係愈跑愈差，黯然退役。呢四匹馬來港評分都係九字頭，據報身價都過千萬，但佢哋來港後都走晒樣。可能馬匹未能適應水土，以致影響馬匹表現。又或者佢地外地嘅賽績水準根本唔高。
再睇埋昆士蘭打吡，自有「明月千里」呢個成功例子後，呢項賽事就成為馬主嘅揀蟀場。但係除咗「鷹雄」外，其餘馬喺香港生涯都係失敗收場。翻查呢項賽事近十屆三甲馬中，只有4匹再出可以贏到一級賽，同時竟有多達22匹馬再出未能於分級賽報捷，當中包括多匹後嚟來港服役嘅馬。換句話講，昆士蘭打吡水準其實唔高，甚至可以話冇G1水準。「佳騰駒」等來港時評分可令佢地直入經典一哩賽很大程度上係因為大家都被「明月千里」影響，誤以為昆士蘭打吡同質素保證刻上等號。
昆士蘭打吡三甲馬來港後成績
馬匹 | 參賽年份 | 成績 | 插班評分 | 在港成績 | 分級賽頭馬 |
明月千里 | 2015 | 亞軍 | 89 | 20戰6冠5亞4季 | 3場G1+1場HKG1+1場G2 |
鷹雄 | 2016 | 冠軍 | 93 | 43戰4冠3亞6季 | 1場G2+2場G3 |
明月青天 | 2016 | 亞軍 | 89 | 8戰全負 | - |
佳騰駒 | 2017 | 冠軍 | 94 | 18戰1冠2季 | - |
喜歡笑 | 2017 | 亞軍 | 86 | 12戰1季 | - |
達龍駒 | 2018 | 冠軍 | 91 | 17戰2冠1亞2季 | - |
鴻圖巨星 | 2018 | 亞軍 | 88 | 38戰2冠3亞3季 | - |
多巴先生 | 2021 | 亞軍 | 82 | 3戰1冠1季（暫時） | - |
再以紐西蘭打吡為例，應屆冠軍「黑桃火箭」只有82分，相比起早年嘅「軍事行動」足足少13分。即使計埋新制（PP都會被調低5分），前駒仍少8分。「黑桃火箭」前三季嘅紐西蘭打吡頭馬，再出竟然夾埋只能贏得一場頭馬，喺賽事水準不如以往，亦解釋到點解「黑桃火箭」會較低分起步。
近五屆紐西蘭打吡冠軍成績
馬匹 | 參賽年份 | 再出成績 |
薑汁脆餅 (Gingernuts) | 2017 | 5戰2冠1亞（2G1） |
Vin De Dance | 2018 | 16戰1冠 |
Crown Prosecutor | 2019 | 4戰1季 |
Sherwood Forest | 2020 | 9戰全負 |
黑桃火箭 | 2021 | 5戰1冠 |
PP插班評分制度嘅改變，雖然使到四歲系列賽事嘅整體評分比往年低，從評分上睇落好似比以往失色，但實際上參賽馬匹在港大多已交出頭馬，同時都有效地篩走靠外地賽績但實質上水準不足嘅賽駒，如「福將」等賽駒。確保具有潛質且進度較好嘅四歲馬能夠參與其中，令賽事更具觀賞價值。
超仔
Comentarios