香港經典盃被稱為爆冷溫床，皆因近十屆入面，有四屆頭馬賠率都過廿倍，當中大前季「妙算達人」更以大冷門身份贏出賽事。如果單睇賠率，大家會認定經典盃總會出現意外賽果，但如果細心留意當中微妙之處，就會發現所謂意外並唔係意料之外，而係有數得計。從以下三點分析，就可以解釋咩情況下會出現「意外賽果」，同埋邊啲參賽馬比較著數。
近十屆經典盃評分差距及勝出馬匹一覽
註：綠底代表該屆頭馬為三大熱門；黃底代表該屆頭馬為冷門
一、評分差距與冷馬勝出關係
評分差距方面，近十屆入面有六屆嘅評分差距都相當大，差距高達29至38分。喺呢六屆入面，就有五屆由三大熱門勝出賽事。四歲賽係以平磅作賽，只要彼此實力差距夠大，高分馬藉此可以佔優，賽果亦會相對正路。
相反，其餘五屆由冷門馬贏出賽事，有四屆差距只係18至23分之間。事實上，當佢哋出戰四歲賽前，大多都只係跑開二班賽，當中不乏仍有上升空間嘅馬，實則上差距未必太大。當中有啲更係贏完經典一哩賽後，先至成為最高分參賽馬。換句話講，呢啲高分馬未必真係鶴立雞群，只係出戰經典一哩賽後被大幅加分，從而造成佢喺同場級數最高嘅假象。
二、要贏，就要高過平均評分？
睇返近十屆嘅經典盃盟主入面，有九屆頭馬評分都比當屆參賽馬平均評分高。即使「魅力知己」都只低過平均評分唔夠2分。從呢個數據中，可以得知一匹評分低於平均嘅參賽馬出啲呢項賽事，往往都會比較吃虧，亦證明大多贏到經典盃嘅馬匹，本身評分上至少都貼近平均水平。
近十屆經典盃第三高分及低分參賽馬評分差距一覽
註：綠底代表該屆頭馬為三大熱門；黃底代表該屆頭馬為冷門
三、第三高分同低分差距跟冷馬勝出關係
如果剔除每屆最高分同最低分兩匹參賽馬，計算下都可以發現當中三屆嘅差距係少於10分，而呢三屆恰巧地都係由冷門馬勝出。換句話講，當我哋撇除極端值(Extreme value)時，可以發現當第三高分同低分嘅差距愈細，能夠反映出當屆大多數參賽馬實力都比較平均，因而高分馬並非完全佔優，反之亦然。
四、今屆經典盃及以後的趨勢
雖然今屆經典盃參賽馬平均評分係歷年新低，但需要留意自購馬(PP)插班評分制度改變後，現時所有PP來港時初次評分都會比往年低。如果往後一直維持現有制度，相信日後經典盃參賽馬平均評分都會同今屆相近。
將以上嘅分析套用落今屆經典盃，可以發現最高分嘅「加州星球」及「浪漫勇士」同最低分「飛天神駒」評分差距高達37分，係七季以來最大差距。賠率方面，現時外地莊家Bet365分別視「浪漫勇士」同「加州星球」為經典盃大熱門及第三熱門，亦除咗反映莊家對呢兩匹馬嘅信心外，亦印證高分馬喺經典盃較容易受到追捧。
另外，多達七匹參賽馬嘅評分低於平均評分，如果按照以上所言，相信「黑桃火箭」打後嘅參賽馬競爭力都會較低。事實上，今屆第三高分嘅「包裝智威」同第三低分嘅「驚喜」評分相差18分，亦印證咗今屆參賽馬實力相對懸殊，理論上係會對高分馬有利。
如果參考返過往經典盃賽果，以上數據對「加州星球」、「浪漫勇士」、「包裝智威」呢三大熱門相當有利。除咗因為佢哋喺評分同實力上都亦比較佔優，從以上兩個角度，都可以睇到呢三匹馬嘅級數同其他對手亦有明顯差距。以此作為參考，相信佢哋喺經典盃會有較大優勢。
超仔
Commentaires