【POG古馬組互有斬獲】Epiphany攻下小倉大賞典 「金輝佳作」鑽石錦標力拼僅負「帝王級」

星期六京都年長馬女限定1400米三級賽京都牝馬錦標，武豊繼續證明自己寶刀未老，行年將近五十有五，都仲有級際賽落袋，睇吓今場佢點騎社台一口馬So Dazzling？直路大家鬥斤兩，對住「奈村佳盈」，用一貫軟功推足400米，任你濱中俊騎足一條直路，都係難越雷池半步，保得住出道至今每年都有級際賽勝仗呢個金漆招牌；武豊賽後仲話自己可以再戰二十年，到時都七十有五，仲係佢天下，有冇人信呀？

同日東京舉行3400米三級賽鑽石錦標，「金輝佳作」(Saliera，李慕華) 部署就似足早幾年同屬絲綢會嘅「威信英明」(Authority)，由跑開中距離轉去大長途試性能，沿途跟住三四位叫緊糊，去到直路頭都仲咁老定，仲唔係食得出？點知計漏前年盟主、春季天皇賞季軍「帝王級」(T O Royal，菱田裕二)，揹住最重磅，沿途留後一格，直路見菱田一推落去已經head住「金輝佳作」，head足400米返嚟，小勝馬頸位，證明未盡退化；「金輝佳作」試準長力，兩個月後嘅春季天皇賞必然係目標所在，不容忽視。

星期日嘅小倉亦有一組1800米三級賽小倉大賞典，KC今期POG古馬組有兩匹馬分途出擊，「里見騰輝」(Satono Glanz) 喺卡塔爾「跌咗個橙」，不過喺小倉「執番個桔」，上個月喺中山金盃影都冇嘅Epiphany搭長程車入九州，搵杉原誠人做替工，早段跟喺馬群中間，彎位開始推足400米，門前及時趕到；戰報常客「頌讚角宿」(Admire Virgo，荻野極) 跟咗個快步速，兼比起步落樓嘅「好森林」(Ho O Amazon) 燒乾，未入彎已經企咗喺度！

精選場次講吓一組泥地賽，星期日東京舉行二月錦標之前，有場3歲同程表列賽風信子錦標，呢組既可以話係阿聯酋打吡預賽，又可以賺肯塔基打吡積分，有心遠征份子唔搏命等幾時？睇吓前田家名下呢匹Ramjet (三浦皇成)，由早段落後放頭馬10個馬位，再喺直路開出強橫後勁，輕鬆炒人3個馬位，肯塔基打吡一程先賺30分；幕後隨即將目標放喺正本戲身上，至於成行與否，就要睇埋下個月伏龍錦標冠軍意向，因為頭馬有40分落袋，萬一決定成行，封邀請信就唔到你收！

知舍POG今期有3匹馬交出勝仗，首先係星期六京都未勝利2400米，社台一口馬Bettles月頭喺東京搵場1800米初出，沿途留到包尾，再開個全場最快末段追返唔少尚算吸引；今次「中1週」返嚟關西、增程600米、再換埋金誠剛上去，同上次一樣留喺馬群後面，一落山開始逐步推進，再沿內欄追一段，反先對手半個馬位，幫ChatGPT賺550分。

同日東京未勝利1600米，Smile Collector (橫山武史) 跑到直路頭意外落樓，人就有少少傷但唔影響出戰沙特賽日；留意「速度大師」半妹、Sunday會一口馬Schnell Laufen (龐可立)，嚟到而家先初出，沿途喺馬群中間，直路諗住移出跑道中間望空，不過隻馬一路側頭向左，唯有移返去入邊再衝過，終點前先啱啱好過到Daisy (戶崎圭太)，幫超、Pisa及薯條賺550分。

最後係星期日東京頭場未勝利泥地1400米，睇吓Justify子嗣、Insel會一口馬Roly Glory (武豊)，上場喺中山用一場泥地1200米初出，草地一段明顯唔夠人快，變咗喺中間位置跑，直路再開個最快末段，跑入亞席；今次增程唔使過馬路效果明顯好啲，一早交到前速守住第2位，直路再同Invincible Papa (毛振鵬) 同Red Allegro (李慕華) 拋離馬群，門前以一條頸位優勢力拒Red Allegro來犯，打開勝門，幫Yan賺550分。

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1