【HKIR】得一場滿額 49駒入選香港國際賽日

除左香港外，日本、愛爾蘭、法國、英國、美國及新加坡都有派馬出戰。香港短途錦標合共有11匹賽駒入選，主隊七匹對外隊四匹。除左上季最佳短途馬「金鑽貴人」外，上屆冠軍「福逸」都有入選。外隊方面就以英國代表「喜菲皇女」（Highfield Princess）最受注目，另外日本就有「消暑樂祭」（Mad Cool）及「加市冠冕」（Jasper Krone）兩匹代表。

而香港一哩錦標方面，雖然香港馬王「金鎗六十」坐陣，但入選賽駒為四項一級賽最多，亦都係唯一一場足14匹嘅一級賽，主隊六匹對外隊八匹。除左「金鎗六十」外，上屆冠軍「加州星球」、馬會一哩錦標冠、亞軍「永遠美麗」同「美麗同享」都有入選。歐洲代表就有今年喺法國五戰四勝嘅高多芬賽駒「本族主義」（Tribalist）及愛爾蘭二千堅尼亞軍「大開羅」（Cairo）。日本就五匹代表，當中出爐一哩冠軍賽冠、亞軍「匯兩川」（Namur）及「神志勇進」（Soul Rush）都有入選。新加坡代表就有「林家準將」入選。

香港盃方面，合共有12匹賽駒入選，主隊七匹對外隊五匹。香港代表當然有覺士盾冠軍「浪漫勇士」，而馬會盃冠軍「直線力山」亦繼續留喺香港盃名單之列。上場馬會盃第四名「觔斗雲」續戰國際賽。外隊方面，古摩亞賽駒「盧森堡」（Luxembourg）及英國冠軍錦標季軍「地平流金」（Horizon Dore）為呢項賽事嘅歐洲代表。日本就派出三駒，分別係產經賞All Comers冠軍「利森名園」（Rousham Park）、秋季天皇賞季軍「先見」（Prognosis）及2021年香港盃亞軍「滂薄無比」（Hishi Iguazu）。

香港瓶方面，合共有12匹賽駒入選，主隊四匹對外隊八匹。主隊希望相信係遮打盃冠軍「將王」，今年終於以2400米一級賽為目標，希望可以有好成績喇！而外隊就有約克郡橡樹大賽及紅寶錦標冠軍「熱心」（Warm Heart）入選，究竟古摩亞會唔會被自己賣走嘅賽駒「將王」喺香港瓶桶自己一刀呢？歐洲代表除左「熱心」外，仲有「風東來」（West Wind Blow）及「真強」（Junko）兩匹，而2021年轉到美國服役嘅「勇兵奮起」（Soldier Rising）就代表美國出戰。日本呢場就派出四匹代表，包括2021年日本打吡冠軍「大帝」（Shahryar）及上年女皇伊利沙伯二世盃冠軍「吉典娜」（Geraldina）等。

Source: HKJC

Photo: HKJC

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1