【HKIR】四項國際賽完成排位 「金鎗六十」抽到14檔

喺排位前就發生左一項小插曲，香港瓶日本代表「大帝」（Shahryar，シャフリヤール）排位前嘅心電圖檢查有異常，香港馬會認為「大帝」不適宜出賽，要求「大帝」退出賽事。幕後一度指出「大帝」問題不大，並希望出賽但不得要領。「大帝」將會運回日本，並會根據到埗後嘅情況考慮是否出戰月底嘅有馬紀念賽。

講番香港瓶，「大帝」退出後，只係剩番駒9匹賽駒上陣。莫雅策騎嘅「熱心」（Warm Heart）就抽到1檔，排位需負117磅嘅佢，排位表上就寫佢可以超2磅上陣。根據Racing Post嘅資料，莫雅最近12個月嘅最低造磅係119磅，相信「熱心」好大機會最終係蝕兩磅，孭119磅應戰。而日本代表缺少「大帝」後，相信排到7檔嘅「生活格調」（Lebensstil，レーベンスティール），此駒將會用上莫雷拉。而香港代表入面最高多分嘅「多巴先生」就會排3檔。香港瓶完整排位如下：

香港短途錦標方面，焦點當然係「金鑽貴人」，呢匹上季最佳短途馬就抽到5檔，應該唔會好似上年咁塞車掛。另外兩匹港隊希望「福逸」同「維港智能」就分別抽到3同4檔。外隊方面，歐洲雌馬「喜菲皇女」（Highfield Princess）就抽到9檔，日本代表「消暑樂祭」（Mad Cool，マッドクール） 就抽到7檔。香港短途錦標完整排位如下：

香港一哩錦標方面，港隊焦點就係香港馬王「金鎗六十」，呢匹8歲就抽到14檔，季內初出加上大外檔，今場相信會相當難跑。季內兩場一哩二級賽分別由「加州星球」及「永遠美麗」贏得，兩匹賽駒分別抽到3同5檔。外隊方面，日本一哩冠軍賽盟主「匯兩川」（Namur，ナミュール）就抽到12檔，而川田將雅策騎嘅「秀逸小島」（Serifos，セリフォス）就抽到4檔。香港一哩錦標完整排位如下：

香港盃方面，應屆覺士盾冠軍兼港隊希望「浪漫勇士」排喺7檔，馬主喺抽檔時被問及遠征歸來初戰嘅影響時就引述就話「浪漫勇士」返到黎食好住好，體重返到正常水平，麥道朗於操練後同佢講覺得「浪漫勇士」嘅操練表現比澳洲果陣仲要好，期待佢嘅表現。馬會盃冠軍「直線力山」就抽到3檔。外隊方面，英國冠軍錦標季軍「地平流金」（Horizon Dore）就排喺1檔，而古摩亞代表「盧森堡」就排喺10檔起步。女皇盃亞軍「先見」（Prognosis，プログノーシス）就排喺6檔起步。香港盃完整排如下：

Source: HKJC

Photo: HKJC

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1