【點先有資格】鄭強輝之子Karson 購入兩幼駒 正申請成為JRA馬主

Homan

14 July 2023 at 2:50:54 am

早前香港人Karson Ka Ching CHENG喺Select Sale兩匹幼駒，合共花費4億1千萬日圓（約2330萬港元），多個媒體報導指其為「威爾頓」馬主鄭強輝之子。

佢喺拍賣會當日接受《競馬論》及其他日本傳媒表示今次自己係第一次黎到日本嘅拍賣會，亦點評左其中一匹投得嘅幼駒，出自Donna Blini嘅雌馬，為「貴婦人」嘅半妹。佢認為呢匹出自Drefong嘅幼駒步姿唔錯。佢同時亦以2億日圓購入出自「龍王」嘅「天鐵」（Gibeon）半弟。佢表示會嘗試讓呢兩駒喺日本上陣先，現時正申請成為JRA馬主。

JRA自2009年開放讓居住喺外國嘅人成為馬主，姐係唔需要擁有日本國籍嘅人都可以成為JRA馬主。只要符合資格就可以成為JRA馬主，咁究竟點先夠資格呢？

海外人士首先要搵一個「連絡責任者」做擔保，簡單啲講就係要搵一個居住喺日本嘅人做你嘅聯絡人，有咩事JRA會透過佢黎聯絡。只要JRA透過會面承認果位人士可以做「連絡責任者」，咁就先過第一關。之後就可以交表格，提交各項身份證明文件、收入、資產資料及品格審查等。

JRA會喺每年嘅4月、7月及11月做一次馬主審查，如果能夠通過審查，就先支持1萬日圓作為登記馬主費，再喺當地開設銀行戶口。其後需支持9萬日圓作登記馬主稅，完成後就可以揀選自己嘅綵衣並開始以JRA馬主身份活動。

可能你會問成個過程只需要比10萬日圓，咁咪好容易？咁當然要過到審查都要符合一定條件，例如果位外國人需要喺世界各地嘅賽馬機構曾成為馬主至少一年，亦唔可以10年內曾被判處監禁及破過產。而收入同資產方面就提出申請起計兩年內收入需超過1700萬日圓（約96萬港元）及資產需超過7500萬日圓（約426萬港元）。不過最困難嘅係相信係要搵到一位居日人士並願意及又被JRA接納嘅人做你嘅「連絡責任者」。

至於Karson最終能否成為JRA馬主呢？如果佢係早前提交左申請，相信佢可以趕得切11月果期審批，如果唔得就要等到來年4月。橫掂兩匹都係0歲馬，慢慢等應該都無問題啦！

Source: デイリースポーツ, JRA
Photo: 拍賣會截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1