【高分低銀】英國各大賽期未能吸引世界各地名駒上陣 現行獎金難以吸引遠征

大賽將至，雅士谷馬場總監Nick Smith日前接受訪問，並指出皇家雅士谷賽期現時面對嘅挑戰。作為英國國內數一數二嘅大賽期，以往都吸引唔少歐洲以外嘅賽駒遠征。不過近年以高獎金作招徠嘅中東沙特及杜拜崛起，加上日本及香港賽事獎金增加，令到部分賽駒選擇以中東賽事為目標或留喺自己地頭出戰更高獎金賽事。

Nick Smith表示雖然近年皇家雅士谷賽事獎金近年都有提升，於歐洲賽事而言，獎金亦相當豐厚。但對比中東、香港及日本而言，吸引力不大。而且要喺皇家雅士谷賽期揚威並不容易，從歐洲以外地區遠征嘅賽駒要有頂級實力先可能有力一爭。以聖詹姆士皇宮錦標為例，上陣賽駒多為一個月前嘅堅尼大賽冠軍，如果美國訓練一匹草地賽駒希望參戰，要擊敗堅尼冠軍看似天方夜譚。加上獎金不高，遠征嘅吸引力可謂極低。所以Nick Smith認為要吸引歐洲地區以外賽駒遠征，相信要再進一步提升獎金。

皇家雅士谷賽期近20年合共有220匹賽駒來自歐洲以外地區，大多來自美國，而當中只有25匹來自日本或香港，要引起遠東地區對賽期嘅共鳴，恐怕並唔容易。現時香港有匯合彩池，多左一個渠道比香港馬迷接觸皇家雅士谷賽期。但日本就需要有日本訓練賽駒於賽期上陣先有機會接受投注，當地馬迷對該賽期未必熟悉。

古活馬場嘅總監Ed Arkell亦同意Nick Smith嘅講法，形容吸引亞洲賽駒遠征光榮古活賽期係相當困難。佢認為英國頂級賽事獎金唔能夠只可以與國內比較，而係應該同世界各地大賽做比較，否則考慮埋運輸成本，其他地區賽駒只會留喺國內，無意遠征到當地。佢認為2019年「迪雅卓」（Deirdre）於蘭秀錦標嘅成功，有助吸引日本賽駒遠征當地，佢希望今年嘅安田紀念賽季軍「神志勇進」（Soul Rush）最終可以成行出戰光榮古活賽期嘅薩塞克斯錦標。

約克馬場總裁William Derby亦認同獎金係現時佢地面對缺少世界各地遠征賽駒參戰嘅原因。約克伊波賽期嘅焦點賽事朱德望國際錦標雖然上年嘅賽事評分排喺全球頭十，但較低獎金未能吸引世界各地賽駒遠征出戰。

究竟英國獎金同世界比差幾多，用啱啱跑完嘅安田紀念賽同今年加左獎金嘅朱德望國際錦標做比較，安田紀念賽總獎金係3.42億日圓（約1716萬港元），而朱德望國際錦標嘅總獎金係125萬英鎊（約1247萬港元）。要記住現時日圓弱勢低水，安田紀念賽嘅總獎金都比朱德望國際錦標高，都未講如果要遠征英國嘅運送、賽期及對手實力等。有配種價值嘅賽駒都話可以贏英國嘅一級賽提升配種價值，但如果係閹馬嘅話，只睇獎金競賽嘅話，似乎無需要以較低獎金賽事為目標。

英國馬會就話佢地近年已經不斷增加頂級賽事獎金，務求讓更多世界各地嘅賽駒出戰英國嘅頂級賽事。不過暫時就仍然跑輸其他地區，相信仍需要繼續增加獎金，否則只會越黎越少賽駒考慮以英國大賽期作遠征目標。

Source: Racing Post

Photo: Racing Post

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1