【重心日本盃】「春秋分」秋季大目標為日本盃

Homan

26 June 2023 at 10:20:38 am

日本馬王「春秋分」（Equinox，イクイノックス）琴日喺寶塚紀念賽大後上奪冠，姿態令人驚嘆，世界各地媒體都認為「春秋分」有力為日本代表贏得凱旋門大賽。

賽後絲綢會代表米本昌史就話終點前佢都相當緊張，好彩最後都可以順利贏馬。就著秋天嘅賽事計劃，米本就話佢地會按原計劃，以日本盃作為「春秋分」嘅最大目標，爭奪杜拜司馬經典賽頭馬出戰日本盃的額外獎金。佢地會以日本盃作為中心部署各項賽事，暫時未知會安排邊一項賽事比「春秋分」喺日本盃前後。

較為正路嘅係安排一場前哨戰比「春秋分」再進軍日本盃，如選擇先跑前哨戰再進軍日本盃，國內嘅一級賽將會相當適合呢匹「北部玄駒」（Kitasan Black，キタサンブラック）子嗣，先出戰秋季天皇賞再轉戰日本盃，這個路線以往亦有不少賽駒選擇。而「春秋分」上年亦曾贏得這項一級賽。

另一個路線則是先遠征再回師日本盃角逐，最常見的是凱旋門大賽遠征過後再出戰日本盃，以往曾有「大震撼」（Deep Impact，ディープインパクト）及「黃金巨匠」（Orfevre，オルフェーヴル）等名駒先出戰凱旋大賽再回師日本盃，前者成功掄元，後者則在終點前僅敗。然而「春秋分」選擇這個部署機會較低，始終以遠征賽事作為日本盃熱身戰，說法有啲牽強。

再另一個較為有可能嘅選擇就係休息至日本盃再上陣，並安排有馬紀念賽作為年內最後一戰。雖然馬房助理今早接受訪問時表示「春秋分」返到馬房後體力並非大量損耗，但或許賽駒有機會未能及時回復狀態，所以選擇日本盃直行都會係幕後嘅選擇之一。

無論如何，「春秋分」現時以約14億9000萬日圓已經登上日本最高獎金賽駒嘅第七位，如果可以喺日本盃登頂，佢可以贏得5億日圓（3億為頭馬獎金；2億為杜拜司馬經典賽頭馬取得日本盃嘅額外獎金），將會超越九勝一級賽嘅傳奇馬后「杏目」（Almond Eye，アーモンドアイ）嘅19億1526萬日圓，成為日本最高獎金賽駒。或者因為一戰即可登頂，幕後選擇以日本盃作為「春秋分」秋季嘅大目標。


Source: sponichi
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1