【超好玩？】馬場竊聽風雲4G 評馬人直播沙圈「friendly chat」惹爭議

據《東方馬經》一個專欄講，早排馬場有單匪夷所思嘅事發生咗。十幾年前馬會已經修咗例，更改策騎指示唔再需要備案，而策騎指示本身一向都係保密內容嚟，一般馬迷正常情況下都冇可能會知道。但最近就有位資深評馬人受邀落沙圈嘅時候，就戴咗一副具攝錄功能嘅眼鏡，仲即場喺自己嘅專頁度開live，有睇到嘅觀眾就可以即場知道啲練馬師喺沙圈畀嘅策騎指示啦。

呢位評馬人嘅專頁本身有訂閱功能，免費喺佢專頁睇到嘅live就好似有三條，至於收咗錢嘅會唔會有多啲？我哋就冇錢去證實呢件事啦。聽講有好多練馬師都認為呢件事好嚴重，但暫時據講官方就冇講到咁做有冇問題。暫時都應該係喺跟進階段。

當然啦，有啲網上直播或者唔同嘅頻道都會有啲咩密探定探長嘅人同大家講啲內幕消息，但好多時都係捕風捉影，看圖睇片寫故事性質居多，畢竟無論係晨操、沙圈定私人聚會嘅談話內容未經當時人同意都應該係要保密，除非uncle自己post返條自拍片出嚟架姐。今次開咗個先例而冇處罰嘅話，唔知會唔會有更多人效法帶啲盜錄眼鏡或者其他器材入場呢？

不過嗰邊嘅版主都有喺留言講到明，呢個唔係訪問，佢係以馬主嘉賓身份同佢哋進行friendly chat，希望大家唔好誤會導致有人投訴咁話喎。究竟呢單嘢有冇觸犯啲咩馬場條例我哋就冇權同冇資格講啦，不過將心比己，如果你同人傾心事「friendly chat」嘅時候發現自己俾人錄音甚至live嘅話，你又會點諗。

話分兩頭，即使俾你知道咗沙圈嘅策騎指示，對你嘅投注又有幾大幫助？「由馬經主編進身專業評馬人」嘅黃嘉豪就曾經咁講：

「現實中，負責任的騎師，通常在賽前會查好賽績睇定錄映帶，對於馬匹的跑法，大抵已經心中有數，何況很多時候人馬實際上是老搭檔，那份溝通勝於任何人，就算是練馬師，也大多會尊重他們的意見任由發揮。落到沙圈，是形式上要向馬主作出交代，除非突然出現了某些條件變化，像去季「喜蓮精神」角逐金盃，會因應對手性能而修改跑法，否則很少需要再臨場去討論。此所以，策騎指示只是名義上存在，大部分時候都可有可無。」

大家消費前記得三思啦，如果真係想有啲必中內幕料，不如畀心機返工好過啦。另外亦都鄭重提一提大家，嚟緊THE NEXTWAVE24喺六月尾就會重返愉景灣，大家唔好諗住用呢招去影女，正正經經帶副太陽眼鏡用眼睛感受就好啦。

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1