【社台流出母馬成最大贏家】Sweep Feet鬱金香賞橫掃全場 Cosmo Kuranda彌生賞率先出線

星期六阪神先上演3歲馬女限定二級賽1600米鬱金香賞，下線出自「東商變革」、母親懷胎時期被社台賣走、輾轉喺北海道夏季拍賣會由一口團體YGG會買入嘅Sweep Feet嚟到爭三冠入場劵關頭換走經驗較少嘅永島真奈美，改用武豊助陣，亦情有可原，總好過浪費機會，果然有回報，由早段尾三位置，彎位開始嚟個大外一氣，一條直路掃晒，連同放足大半程保住亞軍嘅Sekitoba East (藤岡佑介)及喺馬群穿插而上追返個季軍嘅Hawaiian Tiare (西村淳也) 一齊拎走櫻花賞入場劵；知舍POG出3匹馬全數冇分，特別要提「春秋分」半妹Garza Blanca (李慕華)，直路推極唔郁，完全交唔出應有表現，令人失望。

同日中山舉行1200米三級賽海洋錦標，「濠城」(Toshin Macau) 搵嚟橫山武史做替工，用返一貫喺大約第5、6位跑法，直路率先透出，以1 1/4馬位優勢取勝，叫做交回應有水準，只係上到高松宮紀念，再對蹄下敗將Lugal、以至「大海女神」、「出奇致勝」之流，即使啱啱公佈搵李慕華幫手，極其量都係爭獎金位置而已。

星期日中山3歲限定二級賽2000米彌生賞，以為係Shin Emperor大戰Danon Ayers Rock咁簡單？杜滿萊話比大家聽錯晒！睇吓同樣係母親懷胎時期被社台賣走、Big Red Farm買入及生產嘅Cosmo Kuranda，由早段喺大約第6位，跑過半程就拍住放頭嘅Sirius Colt (三浦皇成)，直路再擴大優勢，奠定勝局；Shin Emperor換川田將雅試馬味濃，早段多少比Trovatore (李慕華) 干擾，去到600米柱已經起勢推，仲要人有人騎馬有馬走，臨尾追返少少走入一席第2，以佢走勢皐月賞似乎有危機，長遠跑哩半更啱；Sirius Colt放足大半程保住第3，成功出線皐月賞。至於Danon Ayers Rock (金美琪)？跟到入直路已經散咗，想爭三冠亮起黃燈！跑完呢場知舍POG形勢就簡單，揀咗Shin Emperor就賺2200分，另一匹Schwarze Kugel (西村淳也) 亦跑入第5，幫Alex賺540分。

知舍POG今期有5匹馬交出頭馬。首先係星期六阪神未勝利馬女限定泥地1800米，安田隆行從練生涯最後一星期，為力爭一千場頭馬 (連地方及海外計) 嚟個全倉曬冷，最後只係得兩場頭馬，差兩場先夠數，縱使叫光榮退休，亦略嫌美中不足；不過其中一場頭馬就嚟自POG參戰馬，留意A Qui Mieux Mieux (毛振鵬)，早段已經擺喺第4位，再由彎位開始推足一條直路，最尾幾步先及時趕到，幫JO及Simon賺550分。

https://jra.webcdn.stream.ne.jp/web/jra/onetag2020/eqPcPlayer2.html?target=202401090301

同日阪神一組未勝利2200米，「星光速」喺星期日嘅表列賽大阪城錦標取得久違勝仗，反而今次想同大家睇其半弟、蘿蔔會一口馬Wismar (毛振鵬)，上年兩戰只得亞軍，然而兩仗都所負不遠，初出一仗更係同對手鬥足一條直路先敗陣，水準唔會差得去邊；如今亦打開勝門，由對面直路尾開始逐步推進，直路加速擺脫對手，終點前收韁都贏緊3/4馬位，亦為Homan賺550分。

睇完上面一匹4億5千萬身價嘅Danon Ayers Rock點樣「跌落鹹水海」，再同大家睇一匹「平價」名牌貨，星期日阪神未勝利1600米，友道康夫馬房「秘密武器」、貴為短途馬錦標冠軍「妙發靈機」半弟、河合純二喺Select Sale當歲價1億買入嘅Jun Vin Quete (岩田望來) 千呼萬喚始出來，Tony揀得做POG參戰馬就唔係因為良血馬呢類咁膚淺嘅理由，最主要都係兩位兄長「妙發靈機」同Feengrotten喺POG時段交到表現；只係延誤多時，嚟到今期先作生涯首戰，對住大部份有出賽經驗嘅對手，完全未驚過，岩田望來沿途由得匹馬跟住馬群順走，入到直路一鞭未開就行過全場，兵不血刃大勝5個馬位，Tony即刻賺550分。而家追進度搵一場預賽再駁NHK一哩盃仲趕得切，分分鐘成個比賽就係靠佢反敗為勝，就算唔趕進度，之後啲大賽都一定有佢份。

同日阪神仲有一場1勝1800米，上年贏出寶塚紀念當日場新馬賽嘅Gamble Room (毛振鵬) 再跑兩場三級賽都輸一條街，明顯進度未夠，與其勉強落去，不如落返1勝條件重新部署都未遲，早段有少少上口，本來想留後都變跟前，仲要沿途兜大圈，入直路就拍住Brave Histoire (坂井瑠星) 一齊鬥，最後100米仲有一匹Night Slugger (和田龍二) 加入戰團，都要鬥到最後一步先僅僅到，超拎呢1070分都可以話飽食驚風散！

最後就係星期四笠松一組1600米，A Shin Solar兩個星期前跑一場1400米撞正落雨，放到半路就已經比對手任過唔嬲，今仗就用長江慶悟減磅，對手同谷草四班差唔多都係對返同一批，兼夾天公造美，就可以一放到底，埋單贏2 1/2馬位，暫時轉去笠松跑場場都有分執，幫燈燈及雷狼柴賺70分。

https://keiba-lv-st.jp/movie/player?date=20240307&race=10&track=kasamatsu

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1