【獨欠金子？】日版賽馬娘三週年更新 多位新馬娘令人意外

手機遊機賽馬娘自開發以來就不斷加入新角色，積極開發並吸引更多馬主准許以實名設計馬娘角色。早期只能得到個人馬主授權設計馬娘角色，到近年得到社台及吉田家授權實名設計馬娘角色，如早前嘅「森林寶穴」（Jungle Pocket，ジャングルポケット）及「新宇宙」（Neo Universe，ネオユニヴァース）。早前亦有服役時於Carrot Club嘅名下「西沙里奧」（Cesario，シーザリオ）及Sunday Racing嘅「大鳴大放」（Duramente，ドゥラメンテ）加入馬娘角色。

到左今期更新，製作團隊依然驚喜不斷。喺公布更新嘅直播前已經「唔小心」公布會有三位新角色，分別係2002年寶塚紀念賽冠軍「烈焰快駒」（Dantsu Flame，ダンツフレーム）、由前田家ノースヒルズ擁有嘅2002年皐月賞冠軍No Reason（ノーリーズン）及2003年三冠雌馬Still in Love（スティルインラブ）。如果獲得前田家ノースヒルズ授權，意味著之後有機會見到同樣由前田家ノースヒルズ擁有嘅三冠馬王「鐵鳥翱天」（Contrail，コントレイル）以馬娘身份登場。

到左直播，最令人驚喜嘅新角色相信係Sunday Racing兩大馬娘實名登場，分別係2011年三冠馬王「黃金巨匠」（Orfevre，オルフェーヴル）及2012年三冠馬后「貴婦人」（Gentildonna，ジェンティルドンナ）。睇黎之後仍然有更多來自Sunday Racing嘅馬娘角色登場。

三匹泥地好手2009年及10年JRA最佳泥地馬「希望之城」（Espoir City，エスポワールシチー）、來自前田家嘅2011年JRA最佳泥地馬及杜拜世界盃亞軍「創昇」（Transcend，トランセンド）及地方高多芬（Darley Japan）賽駒Furioso（フリオーソ）。當中Furioso最令人驚喜，亦有唔少幻想會有更多日本高多芬賽駒加入馬娘大家庭。

最後一匹新角色就係黎自一口馬主團體ウイン嘅「凱旋芭蕾」（Win Variation，ウインバリアシオン），呢匹多次被「黃金巨匠」擊敗嘅賽駒亦加入馬娘行列。一口馬主團體ウイン都有一級賽冠軍，為香港人熟悉相信係香港瓶冠軍「瑪蓮必勝」（Win Marilyn，ウインマリリン）及女皇盃及香港盃冠軍「勝出光采」（Win Bright，ウインブライト），睇下之後會唔會見到佢地登場喇！

另外，三週年更新入面，「大鳴大放」將會實裝登場，即係可以以抽蛋方式獲得「大鳴大放」並育成，睇黎啲利是錢（如果仲有得收）都係攞曬課金....

最後最後，如果無記錯的話，絲綢會應該暫時仲未有旗下賽駒加入馬娘行列，唔少都幻想緊「杏目」（Almond Eye，アーモンドアイ）及「春秋分」（Equinox，イクイノックス）加入馬娘，尤其見社台系其他一口馬主團體都有馬娘嘅時候，相信呢個幻想會現實嘅機會大啲。

另一個幻想就係金子真人旗下嘅賽駒，日本馬至寶「大震撼」（Deep Impact，ディープインパクト）至今仍未以實名登場，馬主金子真人會唔會因為吉田家及其他一口馬主團體而授權Cygames設計呢？可以密切留意之後嘅發展！

Source: ウマ娘

Photo: Cygames

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1