【殿堂馬】種王「夏威夷王」及三冠馬王「鐵鳥翱天」入選日本殿堂馬行列

日本殿堂馬由賽馬記者投票選出，每位記者最多可以投四匹賽駒。賽駒如於該年投票中取得四分之三嘅票數，就可以入選殿堂馬行列。今年合共有176位記者投票，獲選門檻為132票。每匹賽駒需於退役後二十年內獲選，否則就需要退出候選之列。

「夏威夷王」合共取得143票，成功獲選入殿堂馬之列。「夏威夷王」服役時曾兩勝一級賽，退役後一直於日本種馬界活躍。佢於2010年及2011年榮登日本最佳種馬寶座，「龍王」（Lord Kanaloa，ロードカナロア）及「大鳴大放」（Duramente，ドゥラメンテ）等名駒都係佢嘅子嗣。今年係「夏威夷王」倒數第二年候選，最終佢都可以獲選入殿堂，與其子嗣「龍王」及其孫女「杏目」（Almond Eye，アーモンドアイ）一樣獲選為殿堂馬。

而上年差一票未能入選嘅三冠馬王「鐵鳥翱天」，今年就順利補中，以152票，超過八成半嘅得票率，入選成為殿堂馬之一。「鐵鳥翱天」於2020年以不敗馬身份贏得三冠，其後雖然於日本盃敗於「杏目」蹄下，轉歲後於兩場一級賽都未能贏馬而回，至年尾日本盃先重返勝門，同年宣布退役，開始種馬生涯。

其餘高票選而未能入選嘅就有「長山之馬」（Oju Chosan，オジュウチョウサン）、「迷人景緻」（Buena Vista，ブエナビスタ）及「滿樂時」（Maurice，モーリス）等。上年底退役嘅「春秋分」（Equinox，イクイノックス）將於來年首次參與殿堂馬投票，且看能否一發入選！

Source: デイリースポーツ

Photo: 直播截圖

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1