【最後三個賽日有咩睇？】「出奇致勝」阪神盃標尾會

星期六阪神舉行年長馬1400米二級賽阪神盃，年尾短途組別繼續大混戰，以為新勝短途馬錦標嘅「大海女神」(Mama Cocha，川田將雅) 可以再下一城，點知跟完三段自己企咗喺度；「妙發靈機」(毛振鵬) 跟足指示擺喺前面走，直路騎落去冇反應；反而跟喺「大海女神」後面嘅「出奇致勝」(Win Marvel，松山弘平) 跟住三段直路仲未斷，門前趕過如狼似虎殺上嚟嘅「愛勁利」(李慕華)，成功標尾會；賽前講明跑完今場退役嘅「攻必勝」(莫雅) 就後追不及，臨尾影贏個第2，都叫光榮退役。

跟進賽事就有星期日阪神3歲以上3勝2000米，今年喺3勝組輸到0比4嘅絲綢會一口馬Saint Camellia (北村友一) 唔怕對手嚟個大逃跑法扯散個馬群，由早段輸前面15個馬位，去到直路開個最快末段33秒8，反先 1 3/4馬位，成功升班；呢匹馬女嚟到4歲尾先上公開組，可以比佢表演嘅時間亦唔多，來年大賽應該係目標所在，值得留意。

知舍POG除咗馬女Regaleira贏出希望錦標之外，仲有4匹馬交出勝仗，先係星期六中京馬女限定未勝利跑泥地1800米，吉田和美名下、「樂透心」半妹Isola Felice出道前都可以話一波三折，本來係蘿蔔會一口馬，募集期間試過做手術之後絞腸痧，蘿蔔會即刻話募集中止，點知康復進度快又趕得切拎嚟上陣，之前跑過一場草地唔得轉跑泥地，點知試出彩虹，早段擺喺第3位，轉彎自動波踩上去拍住對手，杜苑欣喺直路再騎一段彈甩馬群，輕鬆贏3個半馬位，幫Roy賺550分。

同日阪神未勝利1800米，睇吓「攻必勝」半妹、Sunday會一口馬Queen's Walk (川田將雅) 點樣補中？上場初出衰喺對手Oscar Brave嘅鞍上人濱中俊開個超慢步速，直路一走甩佢就捉唔到；今場對手開返個正常步速，川田直路一推就馬如其名walk返嚟，完全冇受考驗下贏2個馬位，幫Davi同JO賺550分；反而POG大船Do My Thing (坂井瑠星)，沿途喺後面冇段好睇，星期四再出又輸一條街，前景堪虞！

星期日中山未勝利1200米，同樣係木村哲也加Sunday會一口馬組合，呢匹英國出世嘅「皇僕」子嗣King’s Breath，一望個血統都預期佢係跑短途至一哩為主，今個月頭初出同場同程用布宜學跑入一席亞軍，今次「中2週」再出換上李慕華，早段拍住Khaleesi (橫山武史) 快開兩段22.8-22.7，門前再推一推就擺脫Khaleesi，幫Tony同Edward賺550分。

最後係星期四阪神1勝馬跑泥地1800米，Ballon d’Or (橫山典弘) 事隔一個月再出，早段留喺馬群入面大約尾三位置，轉直路彎移出外檔踩一段，直路上控制大局，埋單贏1 3/4馬位，幫GE賺780分；上場喺京都初出炒對手一條街嘅Eikai Soul，換個西村淳也上去發揮得幾差，沿途跟住放頭嘅Pod Logo (幸英明) 後面，直路揀入面衝，連Pod Logo都過唔到，呢個第5都有少少失望。

總結12月份POG，跑完今年最後一日個榜執過晒位，計埋希望錦標Regaleira幫ChatGPT賺7000分，大船Shin Emperor幫Tony等人賺2800分、Mr G T跑第5另外再幫GE賺700分，就變咗有份揀Shin Emperor嘅RedBluE力壓南總升上榜首，ChatGPT啱啱過咗佳升上第3位，下半段啲大賽就一浪接一浪咁嚟，最後結果係點？密切留意日本賽後戰報！

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1