【星期日黃昏馬】英國首個週日黃昏馬賽日 騎師馬房手足各有意見

琴晚溫伐咸頓（Wolverhampton）為年內首次舉行星期日黃昏賽事，亦都係六個星期日黃昏賽嘅第一個星期。星期日黃昏賽事至少比平日賽事嘅總獎金提高15000英鎊（約14.7萬港元），吸引左唔少馬報名參賽，八場賽事中有七場喺排位果陣都出足。不過即使獎金有提升，但唔少騎師對於要星期日晚跑馬都有意見。

當中琴日策騎胡森訓練嘅Savvy Brilliance贏馬嘅郗福年（Robert Havlin）。佢直言星期日黃昏賽事係笑話（I think it’s a joke to be honest.）。對於有人就話如果騎師咁唔滿意安排，大可以唔參加星期日黃昏賽。不過「玖寶」馬主許生擁有嘅Savvy Brilliance上兩場都係由佢操刀贏馬，佢就覺得琴日實在唔可以唔繼續騎。佢明白提高獎金有助馬主練馬師部署賽駒出戰，不過同時擁有家庭嘅騎師就要取捨，犧牲與子女共渡星期日嘅時間。郗福年亦認為星期日跑馬嘅安排對馬房手足而言都相當艱難。

成績唔算前列嘅騎師鄧履善（Phil Dennis）就話佢無辦法放棄坐騎，亦理解點解馬主同練馬師會部署啲馬跑星期日嘅賽事。佢坦言佢會因此獲得策騎費，但對於啱啱做左爸爸嘅佢而言，要跑埋星期日並不容易。

騎師薛彭迪（Callum Shepherd）接受Racing TV訪問時亦都質疑有關安排，佢認為喺平地馬季以外喺星期日甚至星期日晚跑平地馬係無需要。而且佢認為呢個安排令騎師喺工作同生活之間取得平衡。佢希望未來可以喺星期日多啲陪家人嘅時間，如陪伴其父睇波等。話雖如此，佢仍然會幫練馬師David Simcock騎馬贏馬，只係覺得自己唔應該喺星期日晚8:30仲喺馬場姐。

馬房手足方面，所有喺星期日晚工作嘅馬房手足都可以額外獲得150鎊嘅薪金。有啲馬房手足就話佢地對賽馬充滿熱情，星期日只係一個星期嘅其中一日，認為可以陪同自己每日都策騎嘅賽駒參賽，都係一件好事。而且佢地又會有額外嘅薪金。

投注額方面，有兩間博彩公司喺頭兩場賽事後接受訪問表示投注淡靜，投注額喺平均以下。但有另一間博彩公司就話佢地收到幾個由馬主們落嘅大額投注。

英國馬會表示改變賽事編排嘅試行計劃會維持兩年，相信呢個星期日跑黃昏馬嘅計劃仍然會持續，暫時只係玩左一個星期，好難作定論，或者等六次星期日溫伐咸頓賽事完結再睇就更好。

Source: Racing Post, Racing TV

Photo: Racing Post

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1