【新潟一千米紀錄保持者】2004年短途馬錦標冠軍「金鎮之光」離世 享年26歲

「金鎮之光」出道之初已經專注短途賽事，憑著其飛快前速，多次於OP賽或級際賽交出好表現。佢第一個級際賽頭馬已經就要去到四歲（舊制五歲）。當時佢出戰三級賽夏季短途錦標，起步後就不段加速，猶如一道閃光完成1000米，以53秒7贏得首項級際賽。而呢個時間打破新潟一千米紀錄，直到而家都無賽駒可以以更快時間完成新潟一千米賽事。

不過佢喺四歲尾天鵝錦標後就需要長期休養，去到五歲尾先再復出。不過佢嘅真正爆發期係六歲。雖然已經六歲，但佢嘅前速依然強勁，呢一年先喺夏季短途錦標贏馬，更喺之後嘅短途馬錦標一放到底贏馬，擊敗「多旺達」（Durandal，デュランダル）同香港代表「好望角」，初嘗一級賽冠軍滋味。

「金鎮之光」以短途馬錦標冠軍之名遠征香港出戰當時仲係跑直路1000嘅香港短途錦標，當時雖然有仍然未輸過嘅「精英大師」列陣，但「金鎮之光」仍然以5.5倍次熱門開閘。可能不單止其一級賽冠軍之名，更因為其直路賽績強勁，曾以53秒7完成1000米，令當時唔少人當日對呢匹日本代表充滿希望。不過沙田同新潟可能有唔同，「金鎮之光」未有發揮水準，最終以60秒1完成沙田1000米，大敗21個馬位而回，未能挑戰「精英大師」皇者地位。

「金鎮之光」回日後先後出戰連同高松宮紀念賽及短途馬錦標等四項級際賽，但都再無頭馬進帳。競賽生涯最後一戰再次遇上「精英大師」，結果雖然放得出，但最終都頂唔到尾，以第10名衝過終點，再次見證「精英大師」贏得一級賽。

「金鎮之光」退役後轉任種馬，但作為當時日本國內少數流傳始終純種馬高多芬阿拉伯嘅血脈，配種成績並不出色。最佳產駒都只係喺地方賽有表現。

「金鎮之光」今早於頤養天年嘅牧場衰老離世，享年26歲。

Source: @3iZczUtbYRZlVS8

Photo: 直播截圖

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1