【放咁快都冇逆噴射】「竹園飛劍」贏人馬錦標拎走短途馬錦標入場劵

星期六中山舉行今年新升格二級賽2000米紫苑錦標，馬主高橋文枝名下有一匹以歌手武藤彩未所命名嘅Moryana，亦順理成章由彩未父親武藤善則訓練，POG時段就由弟弟武藤雅操刀集中出戰一哩賽事，只係跑完紐西蘭錦標之後就換橫山典弘出戰NHK一哩盃，結果得個近字；今場初跑2000米，早段大落後，直路上左穿右插追返10個馬位，仲反先埋Hip Hop Soul，橫山武史都想問返阿爸一句「到底發生過什麼事」？連同7月先贏未勝利賽嘅Shirankedo，3駒一齊出線跑秋華賞。

星期日阪神就上演短途馬錦標前哨戰、1200米二級賽人馬錦標，「竹園飛劍」(T M Spada)富田曉早段死推爛推搶出頭，以為頭兩段開44秒4咁快，入直路仲唔係逆噴射？點知入直路仲越放越起勁彈甩馬群3個馬位，一放到底爆大冷，拎埋短途馬錦標入場劵。跑完主席獎復出嘅「愛勁利」開段全場最快末段32秒4，都鞭長莫及；反而「妙發靈機」今場熱身輸唔遠，去返短途馬錦標一樣有得爭。

同日中山舉行1600米三級賽京成盃秋季讓賽，上年贏出二級賽讀賣一哩盃嘅「神志勇進」(Soul Rush)跑讓磅揹全場最重59公斤未驚過，早段留喺第4位，入到直路追住「極級必勝」(Win Greatest)唔放，終點前啱啱好過埋；賽後媒體訪問「神志勇進」幕後話目標係一哩冠軍賽，以至香港一哩錦標都係考慮範圍，成個日本一哩組別大混戰之下，呢類級際賽中堅份子亦值得留意。

知舍POG古馬組就有一匹馬跟進馬，星期六阪神3歲以上1勝雌馬1600米，Tony、Roy及Michael揀咗嘅良血馬Earth Chronicle早段喺包尾位置，入直路之前仲輸緊10個馬位，團野大成拉出去外檔嚟個大外一氣，一條直路收復失地，贏返馬群半個馬位，3歲馬女對住年長馬跑緊1分32秒9，呢個水準仲唔係馬后級？之後再出當然要留意啦！

知舍POG今個星期有2匹馬交出勝仗，首先係星期六阪神未勝利馬限定跑1400米，9匹馬上陣， G1會一口馬Bouncy Step出道2戰跑左轉都收獎金，今場初跑右轉又如何？早段跟住馬群中間第5位，入直路菱田裕二拉出外檔開個全場最快末段34秒0，終點前力壓Rose Flair，幫首映賺550分。

另一場中山新馬2000米，10匹馬上陣，「米蘭機場」(Linate)首胎、父系「神威啟示」嘅Sunday會一口馬Forlanini初出，早段喺第2位拍住放頭嘅Excel Gold，轉入直路兩隻馬彈甩馬群單打獨鬥，李慕華未打一鞭都交到反應輕鬆追過Excel Gold，未受考驗下贏3個半馬位，幫Hawaii同KC賺720分。

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1