【擊破邦女郎】Ecoro Bloom攻下紐西蘭錦標

星期六阪神舉行年長馬女限定二級賽1600米阪神牝馬錦標，Masked Diva點樣喺莫雷拉甩晒韁繩、狼狽到爆嘅形勢保住勝局，無需多作重覆，睇片睇文就夠，稍後原裝配搭直落維多利亞一哩賽，肯定唱到熱晒，贏面不小；Umbrail (川田將雅) 呢個第2只係落後半個馬位，證明大傷過後戰鬥力冇打折扣，之後再爭維多利亞一哩賽，仍有三甲機會。

同日中山上演一組3歲二級賽1600米紐西蘭錦標，「驍智嬌娃」(Bond Girl) 櫻花賞抽選唔成，唯有轉戰前一日呢組爭NHK一哩盃入場劵，叫埋武豊幫手，早段跟住大約四五位，不過走落有少少搶口，入直路沿內欄拍住沿途放頭嘅Yukino Royal (石橋脩) 一齊鬥，上完斜路一刻以為佔上風，點知數漏同佢走差唔多位嘅Ecoro Bloom (橫山武史)，直路頭諗住揀「驍智嬌娃」同Yukino Royal中間位點知比人封，再揀兜出去Yukino Royal左邊上前，衝得仲勁，去到門前先奠定勝局，小勝3/4馬位；「驍智嬌娃」力壓Yukino Royal跑入亞席，喺POG比賽為4位參賽者賺2200分。

焦點賽事有兩場，先係星期日阪神櫻花賞賽前上演、3歲馬女限定2000米表列賽勿忘草賞，上年喺朝日盃對住一眾雄馬跑入季軍嘅「高野冀望」(Tagano Elpida) 今年用鬱金香賞復出，以為憑級數點都拎到一張櫻花賞入場劵，點知跑個梗頸四返嚟，拎唔到入場劵不特止，連抽選資格都冇，唯有轉戰二千兼換上川田將雅，睇完前半程有三匹對手自殺式快放，一路守住第4位嘅佢帶住剩低嘅對手上前，去到彎位就有Stella Crown (岩田康誠) 拍住比到少少威脅，但川田入到直路移出去推一段擺脫糾纏，以2個半馬位優勢勝出，計埋今場收得賞金1600萬，橡樹嘅出賽位都幾穩陣。

另一組福島年長馬跑1200米公開賽摩根石錦標，阪急盃亞軍「朝霞大王」(Asakara King，齋藤新) 唔夠賞金出戰高松宮紀念，轉嚟呢組可以話虎入羊群，沿途過程亦輕鬆到完全唔似揹緊129磅，由出閘一刻交出前速，快放兩段，直路仲有力拋離對手，贏2個馬位而回，收返少少本賞金，之後再部署年內一級賽，亦可留意。

知舍POG今期出馬唔少，不過得一匹馬交出勝仗。「不撓真鋼」子嗣跑到而家呢一刻似乎跑泥地好過跑草地，睇完「青春永駐」威盡中東，稍後劍指美國，今次同大家睇矢作芳人麾下另一匹精品，星期六阪神一組未勝利泥地2000米，獅子會一口馬Le Cheval d’Or (坂井瑠星) 兩個星期前先喺同場同程出道跑入一席亞軍，今期匆匆再出，成功補中，由早段走馬林中間位置，跑過半程逐步推進咬住前面對手唔放，去到直路頭再鬆一鬆油門，成班對手毫無還擊之力，血洗全場5個馬位，幫Yan賺550分。

https://jra.webcdn.stream.ne.jp/web/jra/onetag2020/eqPcPlayer2.html?target=202402090503

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1