【摩天第三雄】Matenro Sky中山紀念成功上位

星期日阪神舉行1400米三級賽阪急盃，「朝霞大王」(Asakara King，齋藤新) 一出閘就泊車咁泊埋欄，快放三段12.6、21.9、22.8，邊個跟前死邊個，直路頭仲有一個馬位優勢，沿途跟住佢跑線嘅「出奇致勝」(Win Marvel，松山弘平)、Sunrise Ronaldo (古川吉洋) 直路一望空就起勢追，三駒鬥足最後二百，你一步我一步，「出奇致勝」最後幾步仲係步步輸，偏偏係壓線嗰步先贏「朝霞大王」一個馬鼻，拎走高松宮紀念優先出賽位。

同日中山上演大阪盃前哨戰、1800米二級賽中山紀念，講之前先叉開一筆睇吓香港金盃，「浪漫勇士」同「遨遊氣泡」直路單打獨鬥彈甩後面相當精彩，亦好在贏成3個馬位唔使拆小弟招牌，只係連二班中堅、新勝三級賽嘅「觔斗雲」都有一席第3，縱使唔否認年屆6歲仍有進步，不過連佢都可以上名，香港嘅中距離嘅水準如何，大家心照；講返戰情，雨中作戰令唔少熱門份子失準，如「滂薄無比」(金美琪)、Elton Barows (西村淳也) 跑到報失；Matenro Sky (橫山典弘) 就見水即生，一早跟住第3位，直路輕鬆將藤田晉名下身價4億7千萬日圓嘅「小艇」(Dobune，吉田隼人) 趕過，稍後大阪盃同女皇盃似係目標所在；曾經揚威中山草地嘅「地標圖形」重遊舊地，直路追勢一度有威脅，只係臨尾幾步腳軟，呢個第3略有驚喜；上年皐月賞盟主「初日高升」復出搵田邊裕信做替工，全程走大圈，直路拎到出啤酒園握手位，再開個最快末段追回一席第4，都係憑級數搭夠，威脅唔到大局就略嫌失望。

精選場次今期有兩組，星期日阪神就有3勝條件賽3000米松籟錦標，過完POG週期開始上試哩半、今次初跑三千嘅馬女Gold Princess (松山弘平) 揹輕磅好著數，沿途跟住馬群中間大約第7位，轉彎開始逐步上前佔先，直路係得「飛時測距」(Time of Flight，黎敏滔) 上前挑戰，不過Gold Princess臨門仲有兩腳，以1 1/2馬位優勢取勝，成功升班。

同日中山就有4歲以上3勝泥地1200米，上年完咗POG週期就贏2勝賽嘅Manibhadra (戶崎圭太) 再出3勝賽消化唔到輸一條街，今年復出首戰幾乎一放到底，話比大家聽3勝呢一關遲早衝破；今次轉場排個16檔，出閘反應最快，沿途拍住放頭嘅Eifer Seattle (藤懸貴志)，彎位一拍埋去話過就過，直路未受考驗之下輕勝而回。

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1