【恭喜南總】POG比賽最後一週 到底發生過什麼事？

星期六嘅京都競馬場就有3歲三級賽1200米葵錦標，安田翔伍贏打吡之前先贏返組短途，睇吓Puro Magic (橫山和生)，排17檔出閘照殺入內欄帶頭，快開兩段22.5、21.7秒，末段再擺脫沿途拍住佢嘅Pair Pollux (松若風馬)，連同沿途走三疊、最後幾乎衝贏個亞軍嘅Nanao (和田龍二)，擺前三匹d-r-m排隊返嚟；大熱門「劍手就位」(Etes Vous Prets，藤岡佑介) 跑返千二前速唔夠對手快，直路沿內欄追一段，一度威脅三甲之位，但最後幾步明顯腳軟，只得第4。

星期日跑完日本打吡之後例牌上演2500米二級賽目黑紀念，未講呢場之前Tony要講多少少同日場遮打盃，當「桀驁之戀」都可以技術性擊倒香港馬，日本馬圈有冇諗過下年派返幾隻嚟掘金？堀宣行/莫雷拉組合跌咗個橙執返個桔，新勝日經賞嘅Struve喺門前反先「玫瑰騎士」(Chevalier Rose，西村淳也)、Chrominance (李慕華)，成功三連勝；去完卡塔爾復出嘅「里見騰輝」(Satono Glanz，川田將雅) 末段衝唔贏一眾年長馬只得「梗頸四」，上屆經典組又一次令捧場客失望。

跟進賽事就同大家睇一匹古馬組POG，星期六京都4歲以上3勝泥地1900米，年初贏出2勝賽嘅Mystic Lore (坂井瑠星) 小休一輪再出，早段留喺馬群後列，半程過後逐漸推進，去到三四彎角中間一下子反先五六匹對手，轉入直路再踩一段就已經睇住放頭馬嚟食，末段有Gold Balancer (田邊裕信) 上前挑戰，不過難越雷池半步，成功升班。

今個星期係第三屆知舍POG最後一回合，先講重頭戲日本打吡，頭二名都係開安全車，跑入第3嘅「真命新帝」就為Tony等人賺7500分，「蕾麗宮」就為ChatGPT賺3000分，另外有2匹馬交出勝仗。首先係星期日東京未勝利馬女限定泥地1600米，ABC Mart老闆三木正浩失落打吡，反而其千金唐澤繪里加名下2匹馬喺同日東京賽事分途出擊，得冠亞各一，留意Erika Sapphire，上年莫雷拉客串期跑咗三場，都係止於一席亞軍，之後再換李慕華，亦無功而回；等到莫雷拉重臨客串，轉跑泥地，早段已經拍住放頭馬，直路一放行即贏到離行離列，大勝5個馬位，幫Yan賺550分。

最後係打吡過後遺材賽、京都表列賽1800米白百合錦標，喺跑完打吡、POG比賽大局已定嘅情況下，仲有一匹馬可以比參賽者挽回顏面，就係早一輪先打開勝門嘅Mina de Oro (西塚洸二)，今回急急腳再出，早段西塚見冇人放頭不如自己嚟，沿途控制步速亦控得幾好，頭四段開住13.0、23.3、24.6、23.6秒，呢啲步速邊有得追？末段再開多個23秒，一眾對手冇一步埋到身，以1 1/4馬位優勢再下一城，JO及薯條兩位亦賺返2000分。

今期就公佈第三屆POG總成績，縱使大船「野田巨石」打吡一分未得，但係頭二名開安全車最後救咗南總一命，保得住總冠軍；揀「真命新帝」嘅人入面，最高分嘅RedBlue賺咗7500分之後仍以400分之差不敵南總奪得亞軍，AllenW就跌一級變季軍；而Tony以「真命新帝」單天保至尊打法奏效，最後以第7名完成，送少幾份禮物。雖然今屆比賽已經圓滿結束，但係唔代表Tony唔跟進一眾參戰馬，之後佢哋動向係點，密切留意日本戰報！

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1