【大長途帝王】「帝王級」阪神大賞典大獲全勝

嚟到星期日最主要係睇阪神3000米二級賽阪神大賞典，新勝鑽石錦標嘅「帝王級」(菱田裕二) 再次對上「迅追風」(Warp Speed，川田將雅)，上次跑讓磅都贏緊1 1/4馬位，今次轉跑平磅兼夾雨戰，贏得仲遠！睇吓「帝王級」全程點走，沿途跟住第3位，入到直路人哋腳步浮浮，自己一望空仲大把喺手，輕鬆拋離馬群；「迅追風」就早段留後，跑過半程先沿住內檔逐步推進，咬住「帝王級」唔放，只係直路頭比「緣厚情摯」(岩田望來) 封一封，等到自己望空再追，已經太遲，臨門力壓「響號」(菅原明良)，跑入亞席，收返少少本賞金，不過一來一回，相差5個馬位！「響號」初跑三千，仲要比對手揹多1公斤都收回一席季軍，性能不成問題，只係一個月後春季天皇賞要而對強手，反唔反先到都成問題；「緣厚情摯」同「銀音速」(武豊) 只係搵一場嚟開氣，對大局冇威脅幾合理，呢場直接當粉筆字抹咗佢。

中山就有3歲二級賽1800米春季錦標，從練至今未贏過雄馬三冠嘅國枝榮今年又有機會爭奪殊榮，由佢訓練、蘿蔔會一口馬Sixpence (李慕華) 以兩戰全勝身份嚟呢組爭入場劵，沿途守住第3位，直路一拎出嚟掃晒，成功三連勝，亦為李慕華打破年頭至今未贏過級際賽嘅悶局；Allegro Brillante (橫山和生) 沿途慢放保住第2，Lucullan Feast (橫山武史) 門前衝贏Channel Tunnel (松岡正海) 及Cosmo Buddleja (石川裕紀人) 跑入第3，拎走最後一張入場劵。只係睇見個時間就唔多開胃，開緊1分49秒，早段喺頭五位嘅全部返晒嚟，水準似乎唔高；本來諗住話國枝榮想贏雄馬三冠唔需要等到從練最後一季，睇嚟呢句都係要收返，專心等Aaron’s Rod同Arlecchino好過！

另外今期戰報臨時加碼，睇多場星期三嘅賽事。3歲泥地三冠預賽、大井1700米表列賽京濱盃，3匹中央馬對6匹地方馬，不過今次到地方馬贏返一次，地方2歲馬王Saint Honore (服部茂史) 上次雲取賞唔要命狂燒Aigle Noir，燒完仲有一席第3，表現相當出色，縱使已經拎咗羽田盃入場劵，都選擇跑多場收返啲本賞金，今次排1檔起步唔使走大圈，一早霸住第3位，入直路服部拎出嚟再推一推就請晒3匹中央馬食塵，大勝7個馬位！同大家睇完年頭呢三場交流預賽，都可以話比大家聽，唔好以為今年地方馬係「魚腩」，一個月後就到羽田盃，中央馬對住呢啲「有骨魚腩」，分分鐘啃骨！

知舍POG喺星期日仲有1匹馬交出頭馬，阪神未勝利泥地1400米，「純淨之輝」半弟、同樣係白毛嘅Kalpa由出道起一直跑草地，叫做識上名，不過場場輸頭馬兩個半馬位起錶，上場初跑泥地跑入一席第3只係輸2個馬位，今次「中2週」再出，換埋川田將雅上去，早段留喺第5位，直路一望空起勢追住兩匹放頭馬，川田臨門推落去考驗一下，輕鬆反先一個半馬位，幫Dicky、史提夫及Edward賺550分。

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1