【大賽之前發出警報】日經新春盃有「響號」 各路好手請讓路

馬場翻新一單接一單，繼早幾年京都之後，今年又到阪神，正常嘅中京賽期因應場地保養關係又一次調去小倉舉行。星期六先嚟一場年長馬女限定三級賽2000米愛知盃，呢匹「覓奇火箭」加上「覓奇妃」嘅結晶、「覓奇」系馬主野田美月收回自用嘅Mikki Gorgeous (川田將雅)，上年2月先初出，得3個月時間都趕得切出戰橡樹，之後落返條件賽連贏2場上公開班，咁嘅戰績擺落呢組想唔大熱都難！川田發揮應記一功，今次又識喺日本用返谷草常見招數，嚟個中段踩油，佔盡先機，Tagano Passion (菱田裕二) 沿途冇蝕腳程，追足一條直路，亦鞭長莫及，直落三連勝；反而早兩期戰報提過嘅Saint Camellia，轉場換西村淳也上去，沿途吊住Mikki Gorgeous尾，入直路一步都冇，跑到報失！

星期日先喺京都上演2400米二級賽日經新春盃，「響號」(Blow the Horn，菅原明良) 上場京都大賞典跑到心律不正拉停，之後部署有馬紀念又唔夠賞金，唯有轉跑讓磅賽賺錢，早段留喺第8位，直路再衝一段，最後100米控制大局；Savona (池添謙一) 同 Satono Glanz (川田將雅) 一對4歲馬對住年長馬完全冇得跑，固然一個跟快步速一個揹重磅點都有影響，但係上年經典組水準如何，似乎要重新計過。

同日中山就有3歲馬限定2000米三級賽京成盃， Danon Decile 繼續用橫山典弘都係驚個人會唔會發神經，不過今次佢就正常發揮，一早佔據第4位，仲要中途「放低幾兩」，轉直路彎雖然有少少片出去，再擺正堂軚衝上嚟，門前趕過對手；反而阿仔橫山武史今場啲發揮又要叫阿寶出嚟，上次有馬紀念騎「駿天宮」又係咁，今次騎絲綢會一口馬、2連勝上嚟Urban Chic又係咁，早段留後，彎位唔走，門前遲大到先追返個第2，轉彎踩油走分分鐘贏咗啦！同樣2連勝上嚟嘅Jun Gold (坂井瑠星) 全程走大圈，直路毫無反應，表現相當失望。

跟進賽事就有星期日京都4歲以上3勝泥地1800米，與其要睇人玩評分玩到出神入化，由開季評分三字頭，一季六捷，都只係七字頭，離跑大賽爭九丈遠，不如睇一路連勝直上公開組仲好過，3戰全勝嘅「猛熊」(Yamanin Ours) 升班回配武豊又做一課公開試閘，一早跟住第2位，直路輕輕一推已經拋離對手，完全冇出力都贏1 1/4馬位，直落四連勝，今年嘅大賽可以留名連場數糊。

另一場星期三船橋3歲表列賽1800米藍鳥盃，今年新增3歲泥地三冠，有啲地方限定賽事升做中央地方交流賽，不過一日未開放比海外馬跑，一日寫入藍冊嘅級別都係寫LR (Listed-Restricted)，仲使乜分佢係JPN1、JPN2定JPN3？3匹中央馬對6匹地方馬，結果都係3匹中央馬包辦三甲，只係戰情唔係一面倒，要鬥到終點前先分出勝負；Ecoro Gaia (笹川翼) 幾乎放足全程，Ballon d’Or (橫山典弘) 彎位開始踩油威脅佢，不過比足一條直路都過唔到，以為佢兩個直路單打獨鬥？後面仲有匹馬女Ammothyella (坂井瑠星) 門前及時趕到，一網打盡；Ecoro Gaia 步步head住Ballon d’Or過終點，Ballon d’Or呢個第3都幫GE賺400分。6匹地方馬就以佐賀代表Ultra no Hoshi (石川倭) 表現最好，呢個第4只係輸3匹中央馬1個馬位，算有交代。

知舍POG今個星期有3匹馬勝出，星期六中山馬女限定1勝1600米，上個月一出即勝嘅Mirabilis Magic (田邊裕信) 跑返同場同程，只係由對幾隻雄馬變咗齋對馬女，早段攝到內欄大約守第6位，入到直路雖然比對手封一封個位，不過一望空就自動波追上嚟，門前過到London Arms (橫山和生)，幫AllenW賺1070分；Mirabilis Magic下場出戰櫻花賞其中一場預賽，想爭正賽入場劵為時未晚。

星期日小倉頭場，一組馬女限定未勝利跑泥地1700米，絲綢會一口馬Reve Drefong (鮫島克駿) 本身望見「奧斯卡夢」呢個母系後代都怕，早熟得嚟成就高，不過容易骨折，揀POG都幾難揀得落手；父系出自Drefong，拎去泥地發展唔意外，之前4場得1個亞軍，嚟到第5場先打開勝門，一出閘即刻攝入馬群中間，步步推進，最後100米奠定勝局，幫Michael賺550分。

同日另一組京都新馬跑內圈1600米，早幾年贏完一場2歲三級賽就吹到未來馬后，但之後無以為繼嘅Mi Suerte，其第二胎、父系 「不撓真鋼」嘅Sunday會一口馬Mi Esperanza (西村淳也) 終於出道，早段跟喺第7位，轉直路彎移出去就比Lance of Queen (城戶義政)頂住，西村打茅波都要撞個位出嚟，拍住鬥足一條直路佔盡上風，門前就同Onami Konami (池添謙一) 一齊過終點，影相影贏埋，幫鹿賺620分。

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1