【周日再評估】麥道朗撞親冇大礙 周六如常抵港備戰

原定周日（4日）嚟香港參戰經典一哩賽賽日嘅麥道朗，周六（3日）喺澳洲玫瑰崗馬場上陣，第五場夥拍高多芬嘅初出馬Celerity上陣，喺閘前不幸撞到左腳，最終要退下火線接受治理。

馬會發通告，指麥道朗將會按原定計劃喺今晚前嚟到香港，並喺星期日抵達沙田馬場後接受馬會首席醫療主任檢查評估情況。據消息指，麥道朗喺澳洲照嘅X光顯示佢並冇任何骨裂，算係不幸中之大幸。

麥道朗星期日嘅五匹座騎全數由蔡約翰提供，包括經典一哩賽嘅「嫡愛心」、初出馬「競駿輝煌」同「星際快車」、出道兩戰獲一亞一季嘅「健康快車」同長途好手「波爾多」。