【呢張頭馬相值4100萬日圓】Byzantine Dream捧走如月賞

星期日京都舉行1800米3歲三級賽如月賞，少有門前鬥得咁精彩，出自「滿樂時」加上母系「強擊」嘅結晶Shivers (杜滿萊) 拍住T M Listed (酒井學) 放足大半程，直路一度領先，後面有匹上場新山紀念大冷殺入一席第3嘅Water Licht (幸英明) 沿內欄衝上嚟鬥一段，以為兩匹馬就咁鬥到完場？龐可立就話各位觀眾我嚟啦，睇吓Byzantine Dream，沿途喺尾二位置，彎位開始嚟個大外一氣，門前及時趕到，影相仲影贏個馬鼻！

同日東京就有1600米三級賽東京新聞盃，4年之間呢個世界差唔多乜都變晒，要數到不變嘅可能係「金鎗六十」王朝仲喺度，但係如果要講嚟到呢一組三級賽，都可以開返一條4年前出現過嘅翻版Q呢？年屆7歲嘅「紅瑪瑙」(三浦皇成)，幾乎年年都係搏呢場，上年贏完今年打算重施故技，放足大半程，冷不防後面仲有一匹「櫻花」系名下Sakura Toujours (金美琪)，早段伏住第6位，入直路揀內欄追一段，先過一匹「好脆」(Ho O Biscults，岩田康誠)，再過埋「紅瑪瑙」，年屆7歲先修成正果；一眾名氣馬好似「俊彥茶座」(坂井瑠星)、Umbrail (李慕華) 都折戟沉沙，最值得討論係Masked Diva (岩田望來)，起步慢閘，望埋直鏡直頭慢成拍，都冇研訊，水都冇得回，用香港官方賽後報告嘅講法，「小組認為此宗事件是由Masked Diva的行為而造成」，連帶一個警告草草了結，又奈何？

精選賽事方面，可以提一場星期六京都公開1900米泥地，Insel會一口馬、出道至今四戰全勝馬女Awesome Result (武豊) 去完關東之後回師關西，起步雖然慢一慢留喺馬群後面，但去到對面直路逐步推進，去到彎位仲大把喺手咁款，入到直路依然按韁未動，Hapi (松山弘平) 就沿內欄衝一段上嚟挑戰，一度出頭，呢個時候武豊先再推一段，成功反先，直落五連勝。

跟進馬方面，星期六都有一匹古馬組POG可以一提，東京4歲以上3勝2400米，通常以「早春錦標」一名舉行，今年就改稱「浪琴全球最佳賽事紀念」，Danon Galaxy (李慕華) 上場久休復出大勝，今次升班再出，捧到1.3倍大熱，直路頭仲似模似樣，一過200米柱就急速收慢，包尾過終點，賽後發現右前腳不良於行，似乎手尾長；反而上次喺新潟不敵「堅韌力」嘅Struve (金美琪)，早段留喺尾三位置，直路搵位搵一輪，最後200米衝上嚟控制大局，成功升班。

今期亦有一匹古馬組POG升上公開組，星期日京都4歲以上3勝1400米，「朝霞大王」(Asakara King，齋藤新) 3歲尾縮程一哩就連贏2場，之後小休2個月到今期復出，一出閘就搶贏個頭段，直路移出去跑道中間再推一段，完全未受考驗之下贏2 ½馬位，下場出戰阪急盃，到時可以留意呢匹質新份子。

知舍POG今期咁多場加埋出23匹馬，得2匹馬交出勝仗，星期日東京1勝2400米，12月頭贏一場未勝利、之後出戰希望錦標失利嘅Win Maximum (松岡正海) 攀上哩半，用返贏馬跑法，冇人放頭不如自己放，又比佢放足全程，輕取2 ½馬位，姿態有餘未盡，之後部署預賽爭打吡入場劵，亦可兼顧；而呢場勝仗亦為Luka及Alex賺1070分。

同日京都有一組新馬跑內圈1600米，要不是出賽陣容 1) 稱得上星光熠熠；2) 有幾匹知舍POG同場出道搶分，分分鐘呢組報導價值欠奉，計有——

·       「大和赤驥」最後亦係唯一一胎雄馬、社台一口馬Grand Scarlet (黎敏滔)；

·       「觸動心弦」第一胎、社台一口馬Stirring Up (池添謙一)；

·       「真誠少女」半弟Ask Strike (龐可立)；

·       「北部玄駒」半弟Sugar Kun (武豊)；

·       「意式甜釀」(Sciacchetra) 半弟、DMM會一口馬Bidaaya (角田大和)

呢幾匹加埋啲身價都唔知值幾多億，不過就開出一匹安全車，蘿蔔會一口馬World's End (川田將雅) 排17檔出閘走大圈少不了，沿途拍住Bidaaya一路走住四疊，直路推一段就彈甩咗，奠定勝局；Sugar Kun走到五疊入直路，追咗一段都只係過到Bidaaya，呢個第2對大局冇威脅；Stirring Up就留得太後，開到個最快末段都無力回天！

再睇埋星期四笠松一組3歲1600米泥地賽事，A Shin Solar本身岩手出道，而家轉去笠松上陣，年初已經跑咗一場，原定之後再跑一場，點知大雪關係冇得跑，變相賺多咗休息時間，今場用到服部大地助陣，一起步搶到放頭位置，輕鬆放足全程，贏2個馬位，幫燈燈同雷狼柴賺55分。

https://keiba-lv-st.jp/movie/player?date=20240208&race=7&track=kasamatsu

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1