【又倫敦又米蘭】Queen’s Walk勇奪皇后盃 Justin Milano共同通信盃收入囊中

星期六東京舉行3歲馬女限定、1600米三級賽皇后盃，喺知舍POG環節Davi就屯重兵今場出3隻，賽前仲講三隻包晒三甲就fatfat，Rouge Salinas (金誠剛) 冇段好睇，Safira (松山弘平) 直路推極唔近，唔止之前講實力唔夠咁簡單，呢個表現分分鐘係水貨；上年年尾先脫離未勝利行列嘅「攻必勝」半妹Queen’s Walk (川田將雅)，由早段喺尾三位置，再用一條直路輕鬆反先，沿途未受考驗，同JO一齊賺3800分；另一POG參戰馬Arsenaal (李慕華) 就比對手封足半條直路，臨尾望空追上嚟嗰幾步似模似樣，呢個第2都幫AllenW、佳及Edward收返1500分。

星期日京都就有2200米二級賽京都紀念，相比上年「勝局在望」表演賽，今年陣容明顯失色，變咗一堆二線馬混戰，上年季軍「草如茵」(Pradaria，池添謙一) 同新勝挑戰盃嘅「寶徠歌劇」(Bellagio Opera，橫山和生) 鬥足一條直路，小勝3/4馬位，稍後大阪盃又會見到佢哋重賽；老馬「巴氏金屬」(Babbitt，團野大成) 直路沿內欄衝一段以為可以成功偷襲，臨門幾步先腳軟保住一席季軍，大傷過後仲交到貨都算超水準。

同日東京3歲限定三級賽1800米共同通信盃，全場集體拉龜，變咗鬥騎師走位多過鬥隻馬本身實力，友道康夫呢個名牌馬房今屆經典線表現唔太起眼，手上有幾匹贏過1勝賽事，但去到大賽層面都要靠近年當旺嘅ABC Mart老闆三木正浩打破悶局，11月喺馬昆胯下初出即勝Justin Milano今仗換上戶崎圭太，早段走上去佔據第2位，直路一推就控制大局，姿態輕鬆，嚟緊亦會開入皐月賞，到時不容忽視；朝日盃冠軍Jantar Mantar (川田將雅) 今仗復出，唔使好似之前咁計收得賞金加磅已經有著數，不過早段走落多少搶口，之後留喺馬群中間，以為直路大把喺手按韁過晒，點知衝落去反應麻麻，臨門先過到沿途放頭嘅Power Hall (田邊裕信) ，走入亞席，三冠之路似乎亮起黃燈。

最後睇埋星期三大井一組3歲泥地1800米表列賽、今年由南關東限定轉為交流賽嘅雲取賞，3匹中央馬對13匹地方馬，Blue Sun (和田龍二) 由頭放到尾，贏得出色，羽田盃出賽位先佔一席；絲綢會名下白毛馬Amante Bianco (李慕華)，放棄中東邀請留喺日本爭泥地三冠，一出閘「中一中」差啲落樓，跟住留喺馬群中間位置，再追返一席亞軍，幫Dicky及佳賺700分；地方馬就以門別出道、而家轉入大井馬房嘅Saint Honore (服部茂史) 表現最好，一路燒住大熱Aigle Noir (松山弘平)，門前保住季軍，反而Aigle Noir沿途被對手針對，直路當然腳軟，雖然話呢個第4贏甩其他地方對手，但臨尾幾步會唔會話比人聽1800米嫌長？

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1