【光速痊癒？】日本賽駒「湘南山城」被JRA禁賽九個月 轉手後僅兩個月即復出地方賽

今次事件主角係2021年中日新聞盃冠軍「湘南山城」（Shonan Bardi，ショウナンバルディ），呢匹近年轉戰跳欄賽嘅七歲馬喺今年8月初於訓練中心操練時受傷，被診斷為屈腱炎，JRA獸醫指損傷比例為百分之25。所有喺JRA設施內出現屈腱炎嘅賽駒，九個月內唔可以上陣。事實上屈腱炎普遍痊癒時間大約為半年至九個月，以往唔少年長嘅JRA賽駒如被診斷為屈腱炎，都會選擇退役。「湘南山城」嘅馬主國本哲秀亦都決定退役，並將馬匹嘅擁有權喺樂天競馬拍賣網拍賣。

樂天競馬拍賣網為近年退役中央馬其中一個散貨場，唔少地方馬主都會喺呢個網站執平貨，再安排賽駒到地方服役。而七歲嘅三級賽冠軍「湘南山城」連稅後以接近60萬日圓成交（約3.1萬港元），由一位網名為maro1975嘅人士投得。或許因為本身「湘南山城」年事已高，加上預計需要再休養七個月，所以成交價唔算好高。喺NAR嘅馬主登記，現時「湘南山城」嘅馬主為豊島愛子。

「湘南山城」交由大井練馬師佐佐木忠昭訓練，呢個馬房連同「湘南山城」在內只得六匹馬，佐佐木忠昭近三年只得一場頭馬。將傷患交比一個少馬嘅馬房，可能令到佢得到更貼心嘅照顧。不過，佐佐木忠昭似乎就認為「湘南山城」已經好番曬，為「湘南山城」報爭聽日嘅日本短途二級賽東京盃，由東原悠善策騎。

呢個舉動隨即引來極大爭議，唔少人都質疑「湘南山城」嘅屈腱炎傷勢係咪已經好番曬，適合出賽。由於日本無論JRA定NAR嘅賽事，都設有參賽獎金，即使未能跑獲獎金名次，只要完成賽事都會有一定金額嘅獎金。以呢場東京盃為例，「湘南山城」如果能夠安全返到終點，佢可以獲得20萬日圓嘅「着外手当」，再加35萬日圓嘅泥地級際賽參賽獎金（ダートグレード競走出走付加奨励金），合共會獲得55萬日圓，即幾乎可以攞番購入賽駒嘅成本。另外參賽嘅練馬師及騎師都可以獲得獎金。因此唔少人都質疑「湘南山城」嘅幕後會唔會喺「湘南山城」未好番就安排佢上陣。

睇番maro1975即豊島愛子嘅馬主紀錄，雖然都有一匹近排以90萬日圓成交嘅レインボーロード喺佐賀收獲兩個第二，但旗下賽駒經常都係密跑且多數無乜表現，令人質疑佢嘅目標唔係前列名次獎金，而係參賽獎金。即使賽駒毫無競爭性，都會派佢上陣，安全慢跑番黎就得。

最後「湘南山城」會唔會如期上陣就真係要等聽日賽前先知，但今次反映出JRA嘅馬匹禁賽令並不適用於NAR，畢竟兩個係完全唔同嘅機構。但既然JRA騎師嘅禁賽令都會適用於NAR，咁點解馬匹唔得呢？會唔會因為今次嘅事件，兩個機構加強溝通改善情況呢？呢個相信會係之後嘅著眼點。

Source: Netkeiba, rakuten

Photo: 賽事截圖

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1