【一注獨中二千八分】Mr G T同Ho O Purosangue若葉錦標包辦冠亞 攜手出線皐月賞

星期六3歲組賽事連場精彩，有兩場級際賽加一場表列賽，打頭陣係中京舉行嘅三級賽1400米獵鷹錦標，好一匹東京體育盃冠軍Strauss (北村宏司) 不走尋常路，跑完場朝日盃，轉去一哩發展，搵場千四熱身，沿途喺包尾，直路走內檔塞車，即使開到個唔差嘅末段都對大局冇威脅；反而返嚟一哩組別，又係野田系嘅世界，睇吓呢匹喺Select Sale週歲價2億2千萬買入Danon McKinley，上年初出連贏兩場，開入朝日盃以為係爭勝份子，點知跟足三段直路反應麻麻上場轉戰東京，早段開始搶口，落敗亦情有可原；嚟到今場換上北村友一，早段喺大約尾三位置，直路嚟個大外一氣，門前啱啱過到沿途放頭嘅Orchid Romance (內田博幸)，成功賺返一筆本賞金，5月嘅NHK一哩盃出賽位夠晒穩陣。

第二組係阪神表列賽2000米若葉錦標，閘前退出一匹Hortus Palatium (武豊)，得返9匹馬爭2個皐月賞出賽位；香港馬「打team」可能大家睇過唔少，今次就同大家睇日本呢邊點樣用呢招。一對矢作芳人馬房麾下、三番四次喺預賽階段比徒弟坂井瑠星玩謝嘅Mr G T同Ho O Purosangue，趁住坂井瑠星有沙特停賽手尾要跟，停返兩個星期六，就搵替工幫手爭入場劵，前者用藤岡佑介，後者用菱田裕二，由出閘開始，一放一追，去到直路菱田裕二推一推Ho O Purosangue開門比自己友，Mr G T唔使藤岡佑介開鞭都識自動波衝上嚟，拍住鬥足三百米，佔盡上風，以半個馬位取勝；Ho O Purosangue就力拒Keep Calm (鮫島克駿) 來犯，保住亞軍，一齊出線皐月賞，亦為同時揀晒兩匹馬嘅GE賺2800分；連同早兩星期嘅Shin Emperor，矢作芳人加埋有3匹馬跑皐月賞，邊個先係主力都係有趣嘅話題，不過有一點幾肯定，就係Regaleira想贏都唔係咁易！

中山就有馬女限定1800米三級賽百花盃，絲綢會今屆3歲馬女歲到3月都未出到一匹夠資格跑三冠，要嚟到櫻花賞預賽都跑晒嘅星期先有一匹保證出到；今場直頭出夠一對，不過主角唔係李慕華，而係津村明秀，睇佢點樣發揮呢匹Mi Anhelo，早段跟喺馬群中間，直路沿住內欄追一段，一上斜路換正腳好似裝咗摩打咁反先對手，控制大局；再睇李慕華直路點騎Cantiamo？直路頭以為大把喺手，諗住走入面行過晒，點知一個撞牆咁就斷送勝機，最後100米先嚟望空，點衝得贏Hohelied (原優介) ？堂堂冠軍騎師有呢啲發揮，保證在場朋友睇到吐血！

知舍POG呢日仲有2匹馬交出頭馬，首先係中京未勝利1200米，睇吓22年多維爾8月週歲拍賣生、矢作芳人幫藤田晉以56萬歐元買入嘅Awaking，即使上線出自喺日本大獲成功嘅「皇僕」、下線近親有凱旋門盟主「樹林之靈」，但注目程度明顯不及嚟自同一個拍賣會嘅Shin Emperor；論出道時間亦較Shin Emperor早，只係開糊比佢遲得多，要到今期搵川田將雅做替工先開糊，只係沿途過程唔講仲以為睇緊田草四班，早段走緊三疊第四位，入到直路川田按韁未動睇住一對放頭馬嚟食，未受考驗之下大勝3個馬位，幫JO賺550分。

https://jra.webcdn.stream.ne.jp/web/jra/onetag2020/eqPcPlayer2.html?target=202401070303

另一組中京未勝利2000米，蘿蔔會一口馬Cor Leonis (藤岡康太) 由血統 (「織女星」半弟) 、馬房 (友道康夫)、身價 (20萬*400口) 都相當矚目，只係要一場勝仗都要等大半年先有，對住大部份未上過名嘅對手，一早放頭，直路再推一段拋離馬群，以1 3/4馬位優勢一放到底，開個1分59秒返嚟，時間亦算出色，亦都為薯條及Michael帶來550分進賬。

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1